Deputetja dhe nënkryetarja e Bashkimit Demokratik për Integrim (BDI) Teuta Arifi të enjten dhe të premten ka marrë pjesë në Forumin Krans Montana që është mbajtur në Tiranë.

Arifi, e cila iu drejtua pjesëmarrësve në Forum me temë "Integrimi i vendeve të EJL-së në Bashkimin Evropian", theksoi se perspektiva e vendeve të rajonit është në familjen evropiane dhe alternativë dhe tjetër nuk ka. Ajo u shpreh se vendet e rajonit duhet të bashkëpunojnë në të gjitha sferat sepse bashkëpunimi rajonal është shumë i rëndësishëm për integrim në strukturat euro atlantike.

Nënkryetarja e BDI-së foli edhe për rëndësinë e dy marrëveshjeve në rajon, ku BE është investues i drejtpërdrejtë, si Marrëveshja e Dejtonit dhe Marrëveshja e Ohrit, marrëveshje këto që hapin rrugën për integrim në familjen evropiane.

Arifi u ndal edhe në kontestin e emrit mes Maqedonisë dhe Greqisë, duke potencuar se është shumë me rëndësi zgjidhja e kësaj çështje, që do të zhbllokojë procesin integrues të vendit.