Zëvendës kryetari i Qeverisë së Republikës së Maqedonisë, Abdilaqim Ademi u takua sot me Ambasadoren e Gjermanisë në Republikën e Maqedonisë, Ullrike Marija Knoc.

Zëvendëskryeministri Ademi në këtë takim të rregullt e njoftoi ambasadoren Knoc për situatën politike në vend, funksionimin e koalicionit qeveritarë dhe për Implementimin e Marrëveshjes kornizë të Ohrit.

Ademi shprehu qëndrimin e Qeverisë se është e përkushtuar në implementimin e tërësishëm të kësaj marrëveshje e cila hap rrugën vendit për anëtarësim në strukturat euroatlantike.

Zëvendëskryeministri theksoi se Qeveria e Republikës së Maqedonisë vazhdon me zbatimin e reformave që janë të nevojshme për anëtarësim në familjen evropiane dhe se nevojitet edhe tejkalimi i pengesës së fundit, çështja e emrit.

Dy bashkë biseduesit konstatuan se marrëdhëniet në mes dy vendeve janë të mira dhe se ky bashkëpunim duhet të vazhdojë edhe në të ardhmen.
Ambasadorja Knoc u shpreh se Gjermania me kujdes përcjell zhvillimet në Maqedoni dhe fuqishëm përkrah Implementimin e Marrëveshjes së Ohrit dhe anëtarësimin në NATO dhe në Bashkimin Evropian (BE).