Maqedonia dhe Greqia mbesin të përkushtuara dhe e mbështesin procesin që e zhvillon ndërmjetësuesi Metju Nimic në suaza të KB-së. Ekziston vullnet dhe gatishmëri për gjetjen e zgjidhjes së pranueshme të ndërsjellë për kontestin bilateral për emrin, e cila nuk do të shkaktojë dëm asnjërës nga të dyja palët.

Këtë e deklaruan kryeministrat e të dy vendeve Nikolla Gruevski dhe Jorgos Papandreu në takimin e sotëm gjysmëorësh në Këshillin e BE-së.

Në takimin që ishte dakorduar në nismë të përbashkët në frymën e tashmë praktikës së vendosur të kontakteve bilaterale në nivel kryeministrash, siç informoi Kabineti i Gruevskit, janë këmbyer mendime dhe informacione për më shumë çështje me interes të përbashkët dhe rajonal.

Të dy kryeministrat, mes të tjerash, kanë biseduar edhe për sfidat e ndërlidhura me krizën ekonomike botërore, integrimet evropiane dhe euroatlantike të vendeve të rajonit.

Ky është takimi i pestë tet-a-tet Gruevski-Papandreu. Katër takimet paraprake ishin vlerësuar si të dobishme për rritjen e besimit dhe mirëkuptimit mes të dyja palëve, por nuk sollën përparim në zgjidhjen e kontestit bilateral për emrin.