E premte, 29.08.2014
Impresum - Marketing - Arkiva - Kontakt

Yll Press

Është një infeksion gjenital seksualisht i transmetueshëm, më i përhapuri në botë, por edhe më i rrezikshmi: nëse nuk mjekohet në kohë, mund të shkaktojë sterilitet. Simptomat, diagnozat dhe kurat.
Klamidia, armiku i heshtur










Merret përmes marrëdhënieve seksuale të pambrojtura dhe tek të rinjtë shkakton infeksion të rëndë, i cili mund të dëmtojë mitrën dhe tubat e saj. Ka pasoja serioze për shtatzëninë dhe lindjen. Klamidia është një armik i heshtur që prek edhe meshkujt, por nuk ka pasoja aq serioze sa te femrat. Si transmetohet? Pse mund të shkaktojë sterilitet? Si diagnostikohet dhe si parandalohet? Këtyre pyetjeve u përgjigjet një doktor gjinekolog specialist në këtë fushë.

Doktor, mund të na shpjegoni fillimisht se çfarë është klamidia?

Është një bakter gram negativ i palëvizshëm, i cili bën një jetë infraqelizore të detyrueshme. Te femra, ky bakter infekton epitelin cilindrik të qafës së mitrës, qelizat e uretrës ose gjëndrën e Kouperit.

Kë prek?

Kryesisht adoleshentët dhe në 70-80 për qind të rasteve është asimptomatike, pra nuk shfaq ndonjë shenjë të veçantë. Dëmet që mund të shkaktojë janë të mëdha, sepse në pjesën më të madhe të rasteve nuk merret aq seriozisht nga të dyja gjinitë, edhe pse është një nga infeksionet më të shpeshta seksualisht të transmetueshme.

Çfarë rreziqesh ka?

Mund të shkaktojë sëmundjen inflamatore të organeve pelvike, e njohur mes mjekëve si PID, nga anglishtja “Pelvic inflammatory disease”, paaftësi për të mbetur shtatzënë, ose shtatzëni jashtë mitre (kur shtatzënia zhvillohet jashtë mitre, zakonisht në tubat e Fallopit).

Çfarë ndodh kur ky infeksion merret gjatë shtatzënisë?

Mund t’i transmetohet fetusit gjatë lindjes, i cili shkakton infeksion të syve, duke çuar deri në verbim.

Pse prek kryesisht të rinjtë?

Sepse ata ndërrojnë shpesh partnerë dhe nuk përdorin kondomë, madje edhe kur i përdorin, nuk dinë, ose i përdorin keq. Më të prekur janë moshat e reja, kryesisht nga 16 deri në 24 vjeç, sepse kanë mungesë informacioni dhe nuk dinë të mbrohen. Infektohen nga e ashtuquajtura “plaga” e qafës së mitrës, që shpesh dallohet përmes “pap test” dhe njihet si faktori i rrezikut për sëmundjet seksualisht të transmetueshme.

Si mund të mbrohemi?

E vetmja masë parandaluese e sigurt është përdorimi i prezervativit në çdo rast dhe që në fillim të raportit. Pilulat të mbrojnë më shumë, pasi rritja e trashësisë së mykut ul rrezikun e kalimit të infeksionit nëpër tuba. Në fakt, më e keqja është se njerëzit janë shumë injorantë. Përveç Sidës, Papiloma virus dhe Kandidas, të gjitha sëmundjet e tjera lihen shumë pas dore, pra nuk merren kurrë seriozisht. Vajzat nuk e dinë se ekzistojnë dhe mbi të gjitha as që i njohin rreziqet.

Si përcaktohet diagnoza?

Deri para pak kohësh bëhej me tampon endocervikal ose endoretal, teste shumë të përdorshme atëherë. Sot bëhen teste më të thjeshta dhe të shpejta që zbulojnë klamidian në urinë.

Cilat janë shenjat paralajmëruese?

Në 30 për qind të rasteve, femrat kanë sekrecione me ngjyrë të bardhë dhe aromë të keqe, dhimbje aspecifike, ose një dhembje pelvike të vazhdueshme.

Si kurohet ky lloj infeksioni?

Në fakt, edhe terapia nuk është e lehtë për t’u gjetur. Lloji i antibiotikut që do të përdoret mund të kërkojë doza të mëdha dhe mjekim të vazhdueshëm.

Ju thatë se klamidia prek edhe meshkujt. Cilat janë shqetësimet që shfaqen tek ata?

Në vitin 1996, përqindja e meshkujve të prekur nga klamidia ishte 5,8 për qind, ndërsa te femrat 1,9 për qind. Për mashkullin pjesa ku qëndron bakteri është në nivelin e uretrës. Edhe ata mund të kenë probleme me riprodhimin. Shpeshherë meshkujt janë të infektuar dhe pa e ditur ua transmetojnë infeksionin edhe partnereve të tyre.

Ju si mendoni, pse flitet pak për këtë infeksion?

Mendoj se nga pikëpamja sociale nuk ka ndonjë interes të madh. Ndërkohë që për ne mjekët, klamidia është shumë e rëndësishme, duke qenë se jemi profesionistë dhe i dimë rreziqet që paraqet. Dëmet e klamidias i shohim kur kryejmë ndërhyrje kirurgjikale në tuba dhe vezore. Në nivelin pelvik, mund të shkaktojë dhembje barku, prandaj femrat mbeten gojëhapur kur u themi se janë prekur nga klamidia. (shqip)


Publikuar: 18.06.2010 | 12:14
Lexuar: 1850 herė
Printo PDF format Shto nė,..

Komentet
ada (06/03/2014 23:44:18) un kam djegie te urines dhe urinoj shpesh dhe me sasi te vogel car infeksioni mund te kem

Ndalohet pėrdorimi i gjuhės denigruese dhe fjalėve ofenduese ndaj individėve dhe ndaj grupeve specifike, si dhe komentimet qė s`kanė tė bėjnė me temėn e artikullit. Moderatorėt mbajnė tė drejtėn e fshirjes sė komenteve qė thyejnė rregullat e komunikimit.
Emri:
Email adresa:
Komenti:















Developed by: Just5 Studio
Rss furnizime