E mërkurë, 12.12.2018
Impresum - Marketing - Arkiva - Kontakt

Yll Press

Duke u bazuar në zgjedhjet e parakohshme parlamentare të mbajtura në vitin 2014, numrat tregojnë që shqiptarët do të kenë 1 deputet më pak në Legjislativin e RM – së. Në vend që 27 përfaqësues shqiptarë sa janë aktualisht, me një njësi zgjedhore shqiptarët do të përfaqësoheshin nga 26 deputetë.
Shqiptarët, një deputet më pak me një njësi zgjedhore







Astrit Rexhepi

Kohëve të fundit në publik u ngrit cështja e ndryshimit të njësive zgjedhore në modelin elektoral në Republikën e Maqedonisë. Kjo inicijativë morri edhe kahje institucionale, saqë u propozua edhe në Parlament ku edhe hyri në procedurë parlamentare, që Maqedonia nga 6 njësi zgjedhore të bëhet një njësi. Kësaj cështjes ju dha edhe kahje etnike, vallë numri i deputetëve shqiptarë do të rritet apo zvogëlohet nëse bëhet ky ndryshim. Duke u bazuar në zgjedhjet e parakohshme parlamentare të mbajtura në vitin 2014, numrat tregojnë që shqiptarët do të kenë 1 deputet më pak në Legjislativin e RM – së. Në vend që 27 përfaqësues shqiptarë sa janë aktualisht, me një njësi zgjedhore shqiptarët do të përfaqësoheshin nga 26 deputetë.

Në zgjedhjet e parakohshme parlamentare të mbajtura në vitin 2014 morrën pjesë gjithsejt 11 parti politike dhe 3 koalicione. Nga gjithsej 1.780.128 votues të drejtën e tyre e shfrytëzuan 62.96% e tyre apo 1.120.744. Mirëpo nga ky numër, 37.654 fletëvotime u shpallen si të pavlefshme dhe numri i fletvotimeve të vlefshme ishte 1.083.090. Shqiptarët në këto zgjedhje u përfaqësuan nga katër parti politike (BDI, PDSH, RDK dhe PPD) ku gjithsej mblodhën 238.207 vota, apo 22% nga numri i përgjithshëm i fletvotimeve. Dalje më të vogël në zgjedhje kishtë në njësinë zgjedhore numër 6 me 49.69%, kurse dalje më e madhe u regjistrua në njësinë zgjedhore numër 4 me 73.14%.

Ajo që është gjithmonë në qendër të vëmëndjes kur trajtohet kjo temë është numri i votave të djegura gjatë përllogaritjes së numrit të deputetëve me Formulën e D’ Hontit. Nga zgjedhjet e fundit partia që pësoi më së shumti nga kjo ishte ajo e LSDM – së me gjithsej 41.494 vota të shkuara huq, e ndjekur nga VMRO me 40.085 vota, BDI me 30.233 vota, GROM me 27.247 vota, PDSH me 24.753 vota, VMRO Popullore me 16.772 vota, RDK me 12.483 vota dhe Kolaicioni për Maqedoni Pozitive me 10.566 vota të djegura.

Nga zgjedhjet e parakohshme Parlamentare të vitit 2014 Parlamenti i RM – së është në formacionin sic vijon: VMRO me 58 deputet, LSDM me 34, BDI me 19, PDSH me 7 dhe GROM dhe RDK me nga 1 deputet të përfaqësuar.

Duke u mbështetur në rezultatet e fundit të zgjedhjeve të parakohshme parlamentare të vitit 2014, bëra një analizë se në cfarë formacioni do të përfaqësoheshin qytetarët e RM – së në Parlament, nësë Republika e Maqedonisë do të ishte një njësi zgjedhore.

Partitë politike në Republikën e Maqedonisë nga zgjedhjet e parakohshme parlamentare të vitit 2014 dolën më këtë kuotë votash: VMRO DPMNE me 481.615 vota, LSDM me 283.955 vota, BDI me 153.646 vota, PDSH me 66.393 vota, GROM me 31.610 vota, RDK me 17.783 vota, VMRO Popullore me 17.772 vota, KMP me 10.556 vota dhe Dinjiteti me 9.265 vota. Duke përllogaritur numrin e deputetëve me Formulën e D’ Hontit për një njësi zgjedhore, numri i deputetëve për cdo parti politike është sic vijon: VMRO me 55 deputet, LSDM me 33, BDI me 17, PDSH me 7, GROM me 3, RDK me 2 dhe DINJITETI, Koalicioni për Maqedoni Pozitive dhe VMRO Popullore me nga 1 deputet.

Qartë shihet dallimi me numrin e deputetëve të përllogaritur sipas Formulës së D’ Hontit me 6 njësi zgjedhore. VMRO humb 3 deputet, LSDM 1, BDI 1, kurse numri i deputetëve të PDSH – së ngel i njejtë. Nga ky ndryshim përfitojnë partitë e vogla. RDK merr edhe një deputet plus, GROM 2 deputet më tepër dhe në Parlament hyjnë edhe 3 parti tjera më të vogla, VMRO Popullore, DINJITETI dhe Koalicioni për Maqedoni Pozitive me nga 1 përfaqësues.

Dallim i madh shfaqet edhe në numrin e votave të djegura. VMRO – së i shkojnë huq 8600 vota, LSDM – së 8352 vota, VMRO Popullores 8386 vota, BDI –së 8536 vota, PDSH –së 8299 vota, RDK –së 5298 vota, GROM 7903 vota, KMO – së 5283 vota dhe DINJITETI me 4633 vota të shkuara huq.

Nga kjo analizë mund të vërtetojmë se modeli zgjedhor me një njësi zgjedhore në Republikën e Maqedonisë nuk është i dobishëm për partitë politike shqiptare. Shqiptarët do të përfaqësohen me një deputet më pak, duke u bazuar gjithmonë në rezultatet e zgjedhjeve të parakohshme parlamentare të vitit 2014. Dobia e modelit zgjedhor me një njësi zgjedhore qëndron në faktin se nga ky model përfitojnë partitë e vogla politike dhe kemi më pak vota të djegura.

Publikuar: 28.06.2015 | 06:39
Lexuar: 1053 herë
Printo PDF format Shto në,..

Komentet

Ndalohet përdorimi i gjuhës denigruese dhe fjalëve ofenduese ndaj individëve dhe ndaj grupeve specifike, si dhe komentimet që s`kanë të bëjnë me temën e artikullit. Moderatorët mbajnë të drejtën e fshirjes së komenteve që thyejnë rregullat e komunikimit.
Emri:
Email adresa:
Komenti:















Developed by: Just5 Studio
Rss furnizime