Katër persona janë vrarë në orët e hershme të mëngjesit të sotëm, në afërsi të Vitisë, në rrugën që çon drejt Kllokotit, njohtojnë mediat kosovare.

Vrasja është bërë me gjuajtje nga armë zjarri. Mësohet po ashtu se një tjetër person ka mbetur i plagosur, por që është jashtë rrezikut për jetën.

Zëdhënësi i Policisë kosovare për rajonin e Gjilanit, Ismet Hashani, i ka thënë mediave kosovare se besohet që dy persona të vrarë janë shtetas të Maqedonisë, kurse dy të tjerë të Kosovës. Hashani nuk ka mundur të flasë për motivet e kësaj tragjedie, duke mos dhënë kurrfarë informata shtesë, me arsyetimet se hetimet po vazhdojnë.

"Ngjarja e rëndë ka ndodhur herët në mëngjes, në hyrje të Vitisë. Nuk mund ta konfirmojë nëse bëhet fjalë për përleshje apo diçka tjetër, meqë hetimet po vazhdojnë", ka thënë Hashani, duke shtuar se ende nuk dihet identiteti i viktimave. Njësitet e specializuara të policisë kosovare po qëndrojnë ende në vendngjarje.