Unë dhe Nikolla (Gruevski) nisëm iniciativë dhe përpjekje të reja për ta zgjidhur këtë çështje shumë të rëndësishme, kuptohet nën patronatin e KB-së.

Jemi të gatshëm që në afat sa më të shkurtë ta gjejmë zgjidhjen e nevojshme të pranueshme bashkarisht. Gjetja e zgjidhjes nuk nevojitet vetëm për shkak të marrëdhënive bilaterale, por edhe që t'i dërgohet sinjal i fuqishëm tërë rajonit.

Këtë e theksoi kryeministri grek, Jorgos Papandreu gjatë fjalimit në Samitin e Procesit për bashkëpunim në Evropën Juglindore, që po mbahet në Stamboll, duke folur për kontestin bilateral për emrin.

Papandreu theksoi se qëllim dhe vizion i tyre është që të gjitha vendet nga Ballkani t'i bashkangjiten familjes evropiane, si dhe vendosja e dinamikës për zgjidhjen e problemeve rajonale, siç tha, janë mjaft.

Në Samitin në Stamboll merr pjesë edhe shefi i Qeverisë së Maqedonisë. Nikolla Gruevski. Tani për tani nuk ka konstatim zyrtar për takim të ri Gruevski-Papandreu në margjinat e tubimit, edhe pse nuk përjashtohet për të.