E mbushur me emocione, aktorja angleze është ngjitur në skenën e ceremonisë, e mbajtur në Beverly Hilton Hotel në Los Anxhelos, për të tërhequr trofetë për rolin më të mirë dramatik në filmin "Revolutionary Road" dhe aktorja më e mirë jo protagoniste për "The Reader". Janë të parët Globë të Artë që Winslet fiton në karrierën e saj, pavarësisht se është nominuar 7 herë në 12 vjet.

Ndërsa merrte çmimet, e veshur me një fustan të zi, aktorja 33-vjeçare, me sytë me lot, është shprehur: "Më falni, sepse nuk e kam për zakon të fitoj gjëra" dhe gjithë falënderimet e mundshme ia ka drejtuar të shoqit, regjisorit anglez, Sam Mendes dhe dy fëmijëve të saj që po ndiqnin nëpërmjet ekranit nga shtëpia.

Ndërsa Winslet ishte mbretëresha e mbrëmjes, filmi më i mirë i edicionit të 66 të çmimeve Golden Globe, u shpall filmi dramatik "The Millionaire", i regjisorit Danny Boyle. Po ky film është vlerësuar edhe në tri kategori për regjinë, skenarin dhe kolonën zanore.
Një nderim për veprën postume të aktorit Heath Ledger, për personazhin e Xhogerit tek "Kalorësi i zi".

Trofeu për aktorin më të mirë i shkoi Mickey Rourke, për interpretimin tek "The Wrestler", një vepër dramatike që e ktheu në ekran pas shumë vitesh mungesë.
Komedia më e mirën është "Vicky Cristina Barcelona", e Woody Allen.
Aktori më i mirë në kategorinë e komedisë është Colin Farrell, për interpretimin në "In Bruges", dhe aktorja më e mirë Sally Hawkins, për rolin tek filmi i Mike Leigh "Happy go lucky".

Nga seritë dramatike, si më e mira u vlerësua "Mad Men".
Dhe nga kategoria e filmit më të mirë të huaj, fitues ka dalë filmi i animuar "Vals with Bashir" i Ari Folman.
Shekulli