Kryetari i Bashkimit Demokratik për Integrim Ali Ahmeti, në një letër dërguar presidentëve që morën pjesë në Samitin e zhvilluar në Prevallë të Prizrenit, ka përgëzuar ata, për përkushtimin e tyre rreth integrimit të rajonit në BE dhe NATO.

Proceset integruese, si ato rajonale ashtu edhe euro-atlantike edhe një herë u konfirmua se janë alternativë e vetme për popujt dhe shtetet e Ballkanit perëndimor. Praktika e mirë e filluar në Vlorë dhe Ohër u dëshmua edhe në takimin e Prizrenit.

"Vendet tona, si fqinjë të mirë, po e rikonfirmojnë realitetin e ri se kur ka vullnet të mirë, kur kultivohet klimë e mirëkuptimit dhe fqinjësisë së mirë, nga shtete rivale dhe me paragjykime për njeri-tjetrin, po shndërrohemi në partnerë dhe aleat në orientimet tona për Ballkanin e integruar në NATO e BE dhe rajoni ynë, nga vatër e krizave të shpeshta dhe e luftërave të përgjakshme po bëhet faktor paqeje e stabiliteti", thuhet në letrën e Ali Ahmetit dërduar presidentëve të rajonit.

Lideri i BDI-së, Ahmeti në letrën e tij ka përgëzur liderët për shembullin e mirë që japin në integrimin e Ballkanit.

"Maqedonia, Shqipëria, Mali i Zi dhe Kosova po promovojnë vlerat evropiane në rajonin tonë. Lëvizja e lirë e qytetarëve, lufta kundër trafiqeve dhe krimit të organizuar, rruga e reformave, bashkëpunimi i sinqertë mes këtyre vendeve siguron për popujt një të ardhme më të mirë dhe zhvillim të qëndrueshëm ekonomik.

Duke ju uruar dhe përgëzuar për kapacitet e liderit që po dëshmoni me këto porosi që po përcillni nga Prizreni i lashtë, Ju garantoj se vlerat, benefitet dhe të mirat e këtyre takimeve gjithnjë e më shumë do të dëshmojnë se Ju jeni burrështetas të vërtet, vizionar që edhe me shembullin personal po trasoni rrugën e pa kthim të bashkëpunimit, integrimit dhe perspektivës evropiane të shteteve dhe popujve tanë.

Uroj që në takimet e radhës, katërshes suaj ti bashkohen edhe personalitete tjera me ndikim, sepse rajoni ynë ka nevojë për unitet, për politikanë të guximshëm, të cilët do të dinë të ndërtojnë urat e bashkëpunimit, të ndërtojnë rrugë të cilat popujt tanë do i bashkojë në Evropën e bashkuar", thuhet në letrën e liderit të BDI-së Ali Ahmeti, dërguar Presidentit Topi, Sejdiu, Ivanov dhe Vujanovic.