Kryetari i komunës së Gostivarit e shpërbleu fituesin e medaljes së bronztë për matematikë në Ballkaniadë

Fituesi i medaljes së bronztë në Olimpiadën e fundit ballkanike në matematikë, 15-vjeçari Leart Taravari sot nga kryetari i komunës së Gostivarit mori mirënjohje dhe shpërblim në të holla për suksesin.

Ky matematicient i talentuar, nga fundi i qershorit, në qytetin rumun Valçea, ishte pjesë e ekipit gjashtëanëtarësh nga Maqedonia.

Gjatë bisedës me kryetarin e komunës Rufi Osmani, Learti tha se konkurrenca e garuesve ishte e fortë, por me diturinë e tij megjithatë ka arritur në piedestal.

Osmani e inkurajoi këtë gjimnazist dhe i dëshiroi sukses në shkollimin e tij dhe se në të ardhmen, komuna do të ndihmojë çdo pjesëmarrje të tij në garat ndërkombëtare.

Ky matematicient i talentuar nga Gostivari, disa vite më radhë arrin suksese në garat vendore dhe ato ndërkombëtare në matematikë dhe fizikë. Learti, arsimin e mesëm e kryen në shkollën e mesme private "Jahja Qemal".