E enjte, 13.12.2018
Impresum - Marketing - Arkiva - Kontakt

Yll Press

Si qytetar i shtetit të cilit ai i kërkon ndihmë, unë do të kisha dashur që të sqarohesha për disa pikëpyetje që dalin nga letra e tij. Pyetjet janë më poshtë:
Kastriot Myftaraj me 70 pyetje ndaj Komandant “Malishevës” (Muhamet Krasniqi)
Kastriot Myftaraj me 70 pyetje ndaj Komandant “Malishevës” (Muhamet Krasniqi)

Muhamet Krasniqi, i quajtur Komandant “Malisheva”, në letrën e tij të hapur, i bën thirrje shtetit shqiptar, të cilin e quan babai i të gjithë shqiptarëve, që ta ndihmojë atë dhe të arrestuarit e tjerë për ngjarjet e Kumanovës, majin e kaluar.

Si qytetar i shtetit të cilit ai i kërkon ndihmë, unë do të kisha dashur që të sqarohesha për disa pikëpyetje që dalin nga letra e tij. Pyetjet janë më poshtë:

1) Muhamet Krasniqi, në letrën e tij, pasi ka bërë një hyrje të gjatë për gjendjen e shqiptarëve në Maqedoni, shkruan: “Të gjitha këto që I përmenda më lart janë arsyet që UÇK-ja, ka filluar me u riaktivizu. Inciativën për këtë e kanë marrë Mirsad Ndrecaj dhe Beg Rizaj, gjashtë muaj kanë punuar për këtë mobilizim.”

2) A është i besueshëm dhe i sinqertë Krasniqi kur përgjegjësinë madhore ua ngarkon dy njerëzve që kanë vdekur, Ndrecajt dhe Rizajt?

3) A është i besueshëm dhe i sinqertë Krasniqi kur ai përgjegjësinë politike për nisjen e luftës ua ngarkon politikanëve pa emër nga Shqipëria dhe Kosova, me të cilët na paska komunikuar Mirsad Ndrecaj tashmë i vdekur? Këtë e them se Krasniqi shkruan në letrën e tij: “Dikush mendon që si u bë e pse u bë që ndodhi kjo, a mos ndoshta kokë me vete është fillu mobilizimi? Jo, vëllëzër e motra sipas asaj çka më ka thënë Mirsad Ndrecaj e edhe që e kam parë është marrë pëlqimi i shumë politikanëve shqiptar në Kosovë e Shqipëri, po ashtu edhe i shumë veprimtarëve në Maqedoni e të më se 90 % të veteranëve.”

4) Çfarë lloj pëlqimi dhanë këta politikanë?

5) A dhanë ata garanci për mbështetje konkrete?

6) Cilët janë këta politikanë?

7) Pse nuk i thotë emrat e tyre sot kur është e qartë se ata nuk e kanë mbajtur fjalën?

8) A është i besueshëm dhe i sinqertë Krasniqi kur edhe këtu i referohet një njeriu të vdekur, Mirsad Ndrecaj, si burim?

9) Çfarë dëshmie mund të sjellë vetë Krasniqi sa i përket dhënies së pëlqimit nga politikanët shqiptarë të Tiranës dhe Prishtinës për nisjen e luftës?

10) Pse kur nisi lufta dhe grupi u gjend ngushtë në Kumanovë, nuk telefonuan asnjë nga këta politikanë shqiptarë, por Ali Ahmetin, i cili nuk ua kishte dhënë pëlqimin.

11) A është i vetëdijshëm Krasniqi për kuptimin e fjalëve të tij kur shkruan në letrën e tij: “ne në bazë të urdhërave të Shtabit të Përgjithshëm është dasht të mobilizohemi”

12) Nëse ka pasur një Shtab të Përgjithshëm, i cili ka dhënë urdhra, atëherë, a nuk është dashur që të ketë qenë ai, i cili ka marrë vendimin për riaktivizim të UÇK?

13) Meqënëse kuptohet se ky shtab i përgjithshëm nuk është ai i vitit 2001, cilët janë anëtarët e Shtabit të Përgjithshëm të rikrijuar, të cilët e mbajnë këtë përgjegjësi?

14) Meqënëse UÇK e riaktivizuar paska pasur një shtab të përgjithshëm, kuptohet se ajo ka pasur edhe një komandant të përgjithshëm, prandaj a mund të na e thotë Muhamet Krasniqi emrin e komandantit të përgjithshëm, i cili e mban më së shumti këtë përgjegjësi?

15) Apo Muhamet Krasniqi do të na thotë se emrin e komandantit të përgjithshëm e dinin Mirsad Ndrecaj dhe Beg Rizaj?

16) Meqënëse UÇK e riaktivizuar paska pasur një shtab të përgjithshëm, atëherë kuptohet se ka pasur edhe një shef të shtabit të përgjithshëm, prandaj a mund të na e thotë Muhamet Krasniqi emrin e tij, pasiqë është ai që mban më së shumti përgjegjësi teknikisht për veprimet në Kumanovë?

17) Apo Muhamet Krasniqi do të na thotë se emrin e shefit të shtabit të përgjithshëm e dinin Mirsad Ndrecaj dhe Beg Rizaj?

18) Meqënëse UÇK e riaktivizuar dhe për të cilën u bënë gjashtë muaj përgatitje, paska pasur një shtab të përgjithshëm, atëherë kuptohet se ka pasur edhe shtabe regjionale, do të thotë shtabe të zonave operative, prandaj a nuk duhet Muhamet Krasniqi të na thotë se cili është emri i komandantit të zonës operative të Kumanovës?

19) A nuk duket e logjikshme që komandanti i zonës operative të Kumanovës të ketë qenë më së shumti përgjegjës për situatën në atë zonë?

20) Apo Muhamet Krasniqi do të na thotë se emrin e tij e dinin Mirsad Ndrecaj dhe Beg Rizaj?

21) Meqënëse UÇK e riaktivizuar paska pasur një shtab të përgjithshëm, dhe paska bërë gjashtë muaj përgatitje, atëherë kuptohet se në këtë shtab ka pasur edhe drejtori të zbulimit dhe të kundërzbulimit, ose së paku të SHIK, sipas modelit të UÇK të vjetër, prandaj a nuk duhet që Muhamet Krasniqi të na thotë emrin e drejtuesit, ose të drejtuesve të tyre? Sado të paorganizuara të kenë qenë këto drejtori, ato kanë përgjegjësi.

22) Apo Muhamet Krasniqi do të na thotë se emrin e tij, apo të tyre e dinin Mirsad Ndrecaj dhe Beg Rizaj?

23) Çfarë detyre i kishte dhënë Shtabi i Përgjithshëm i të supozuarës UÇK të riaktivizuar grupimit ushtarak të dislokuar në Kumanovë?

24) Muhamet Krasniqi shkruan kështu në letrën e tij për urdhërat e Shtabit të Përgjithshëm të UÇK për grupin e Kumanovës: “Pasi ky shtet, pas ‘bombave’ të Zaevit po shkonte drejt destabilizimit dhe ne në bazë të urdhërave të Shtabit të Përgjithshëm është dasht të mobilizohemi në heshtje dhe të qëndrojmë e të presim momentet se kur duhet të dalim në skenë.”

UUUUUAAAAAAAAUUUUUUUUUUU!!!
Domethënë, meqënëse Maqedonia për herë të parë që pas krijimit të saj si shtet i pavarur, po shkonte kah destabilizimi i saj prej vetë sllavo-maqedonëve madje situate mund të shkallëzohej deri në luftë civile mes vetë sllavo-maqedonëve, Shtabi i Përgjithshëm i UÇK të riaktivizuar, mori vendimin që shqiptarët të dalin në skenë me një kryengritje të armatosur në momentin e përshtatshëm, në këtë situatë.
Përse duhej një kryengritje e armatosur shqiptare, në situatën dhe kohën kur sllavo-maqedonët po e destabilizonin vetë shtetin e sunduar prej tyre?

25) A nuk ishte destabilizimi i Maqedonisë prej vetë sllavo-maqedonëve skenari më i mirëseardhur për shqiptarët?

26) A nuk duhej që shqiptarët të tregoheshin sa më të përmbajtur në këtë situatë, pasi çdo lëvizje e tyre do t’ i jepte shkak Gruevskit që të akuzonte opozitën se ishte duke bashkëpunuar me shqiptarët për të shpërbërë Maqedoninë?

27) Meqënëse edhe fëmijët e Kumanovës dhe të Shkupit e kuptonin se, nëse Zaev do të publikonte këto fakte, atëherë Maqedonia mund të rrëshqiste madje deri në luftë civile mes vetë sllavo-maqedonëve, a mund të mendohet se këtë gjë nuk kishin arritur ta kuptonin drejtuesit e UÇK-së të rikrijuar?

28) A e kupton Muhamet Krasniqi se destabilizimi i Maqedonisë prej vetë sllavo-maqedonëve, kishte një datë të saktë në atë kohë, 17 majin 2015, ditë në të cilën kryetari i opozitës Zaev kishte thirrur protestën më të madhe kundër qeverisë, tashmë të lëkundur seriozisht nga publikimi i video dhe audiopërgjimeve prej tij? Zaev me këtë rast kishte paralajmëruar publikimin e përgjimeve për Çështjen “Monstrum”, me të cilët vërtetohej se kryeministri Gruevski dhe shefi i shërbimeve të fshehta Mijallkov, kishin vrarë qytetarë sllavo-maqedonë, për të akuzuar disa shqiptarë për një akt terrorist. Kishte shumë rëndësi që këto përgjime t’ i publikonte pikërisht kryetari i opozitës maqedone. Sepse kështu publikimi i përgjimeve do të shkaktonte një aksion politik sllavo-maqedon kundër qeverisë.

29) A mund të besohet se Muhamet Krasniqi dhe shokët e tij nuk e kishin kuptuar që një kryengritje e armatosur shqiptare ishte pikërisht ngjarja që i duhej Gruevskit në këtë situatë, për ta bëre Zaevin që të vetëfrenohej dhe të mos publikonte përgjimet e tij me rastin e protestës së 17 majit?
Sepse pas ngjarjes së 9 majit në Kumanovë shumica e sllavo-maqedonëve të cilët më herët do të kishin reaguar dhunshëm ndaj qeverisë e cila kishte vrarë qytetarë sllavo-maqedonë për të montuar një çështje gjyqësore për terrorizëm, pas asaj që s’ mund ta perceptonin ndryshe përveçse si kryengritje të armatosur shqiptare, do të mendonin ndryshe.

30) Meqënëse kur Muhamet Krasniqi na thotë se Shtabi i Përgjithshëm i UÇK-së kishte urdhëruar që UÇK të mobilizohej në heshtje por të rrinte në pritje, ai kërkon të largojë nga vetja dhe shokët e tij përgjegjësinë për atë që lufta e Kumanovës i shërbeu Gruevskit, për të shmangur më të keqen në përplasjen me opozitën, a mund të na shpjegojë Krasniqi se si është e mundur që një ushtri guerrile, me mijëra njerëz, siç mëton ai, të mobilizohet pa rënë në sy në një vend të vogël si Maqedonia, aq më tepër në një pjesë të vogël të territorit, në trojet e banuara nga shqiptarët, që gjithsesi janë një territor nën kontroll ushtarako-policor armik?

31) A mund të besohet se komandantët veteranë të luftrave guerrile nuk e dinin se një ushtri guerrile e mobilizuar duhet të hyjë në aksion, ndryshe do të gjendet nën goditjet e armikut, aq më tepër kur është e dislokuar brenda në qytet?

32) A ndjen përgjegjësi Muhamet Krasniqi tani që ai dhe shokët e tij u bënë shkak që Zaev të mos mund t’ i publikonte përgjimet për “Monstrumin”, me rastin e protestës së 17 majit, dhe madje as t’ i publikonte ato edhe më vonë, deri më sot?

33) A ndjen përgjegjësi Krasniqi para të dënuarve për çështjen “Monstrum” dhe familjarëve të tyre?

34) Nëse Krasniqi ankohet se do të kalbet në burgjet maqedone, a nuk kanë të drejtë të dënuarit e çështjes “Monstrum” që të ankohen se po kalben në burgjet maqedone për shkak se disa horra të uniformuar shkuan nga Kosova në Maqedoni për të bërë një hajgare me armë?

35) A mund të na thotë Muhamet Krasniqi se cili ishte objektivi politik i luftës që UÇK e riaktivizuar do të niste në Maqedoni, pra çfarë synonin të arrinin politikisht, meqënëse Marrëveshjen e Ohrit e quanin të dështuar? Në letrën e tij, Krasniqi shkruan: “finalja e gjithë kësaj do të ishte konfederatë ose federatë në ndarje në baza etnike në Maqedoni.”

36) Cila instancë e UÇK e mori këtë vendim, për të nisur një luftë të armatosur për konfederalizimin/ federalizimin e Maqedonisë, Shtabi i Përgjithshëm, Drejtoria Politike?

37) Apo Krasniqi do të na thotë se edhe këtë gjë e dinë Mirsad Ndrecaj dhe Beg Rizaj?

38) A mund të jetë i besueshëm Krasniqi kur na informon për qëllimin e luftës, që sipas tij ishte konfederalizimi/federalizimi i Maqedonisë mbi baza etnike, kur ky “komandant” qartësisht nuk e di kuptimin e fjalëve “konfederatë” dhe “federatë”?
Sipas renditjes së fjalëve prej Krasniqit, objektiv prioritar politik i luftës ishte konfederalizimi i Maqedonisë, e nëse nuk arrihej ky, federalizimi. Por fjala “konfederalizim” do të thotë krijim i një konfederate. Dhe fjala “konfederatë” ka kuptimin e bashkimit të disa federatave. Zvicra quhet konfederatë, për shkak se disa nga kantonet e saj janë federata, pasi atyre iu janë atashuar disa njësi të quajtura gjysmëkantone. Në çdo rast, nuk imagjinohet sesi Maqedonia e ndarë mund të jetë një konfederatë, ndonëse mund të jetë një federatë.

39) Meqënëse procesi i federalizmit të Maqedonisë, duke pasur parasysh realitetin etnik të këtij vendi, është një gjë e ndërlikuar, do të ishte interesante nëse Muhamet Krasniqi do të na ndriçonte më tepër mbi këtë çështje, pra se ku do të kalonte vija ndarëse federale në hartën e Maqedonisë, sipas projektit të drejtuesve të luftës?

40) Megjithëse ka dyshime të mëdha, të arsyeshme për aftësitë e Muhamet Krasniqit si map reader, a mund të besohet se ai nuk e di se Kumanova dhe Likova, zonat ku u zhvilluan luftimet, si dhe zonat e tjera të banuara me shqiptarë në lindje të Shkupit (komunat e Çairit dhe Haraçinës), nuk kanë vazhdimësi me territoret shqiptare në Maqedoninë Perëndimore?

41) Pra si mund të ketë federalizim të Maqedonisë, kur territoret me shumësi popullsie shqiptare nuk kanë vazhdimësi, në perëndim dhe në lindje të Shkupit?

42) A mund të na thotë Muhamed Krasniqi se si kishte menduar UÇK ta zgjidhte problemin që përbënin për federalizimin, dhe vetëm në zonën e sipërpërmendur, mbi 400 mijë qytetarë maqedonë sllavë (100 mijë prej të cilëve në Kumanovë dhe Likovë), të cilët e pengojnë krijimin e një realiteti të ri etnik në hartë, me vazhdimësi mes territoreve me shumësi popullsie shqiptare?

43) Muhamed Krasniqi mëton se plani i tyre kishte mbështetjen e SHBA. Ai shkruan në letrën e tij: “Ajo që mund të them e që është më e rëndësishme është fakti se për aktivitetin e grupit tonë kanë qenë të informuar edhe SHBA-të sepse amerikanët kanë qenë e janë miku ynë i përjetshëm. Amerikanët kanë kërkuar nga Mirsad Ndrecaj e Beg Rizaj, që në grupin tonë të mos involvohen element të ISI-it, pra elemente fetar të mos infiltrohen. Por Mirsad Ndrecaj, i ka garantuar dhe ka premtuar amerikanët se ne do të jemi mendja juaj, do të jemi sytë tuaj, e do të jemi trupi juaj në teren. Kjo është e vërtetë.”
A është i besueshëm Muhamet Krasniqi në letrën e tij, kur për gjërat më të rëndësishme (komunikimin me amerikanët apo edhe vendimin për riaktivizimin e UÇK-së në Maqedoni), përgjegjësinë ua ngarkon dy njerëzve të vdekur, të cilët janë Mirsad Ndrecaj dhe Beg Rizaj?

44) A e kupton Muhamed Krasniqi se kur thuhet një rrenë bëhet llogari se cili do ta besojë, pra do ta hajë rrenën, ndryshe përfundon duke rrejtur veten në qelinë e burgut?

45) Nëse Muhamet Krasniqi dhe shokët e tij kishin mbështetjen e amerikanëve, atëherë përse përfaqësuesit e OSBE në Maqedoni, të cilët janë nën kontrollin e amerikanëve, nuk ndërmjetësuan me autoritetet maqedone për një zgjidhje të ngjashme me atë të Haraçinës në 2001, kur ushtarët e UÇK u nxorrën nga rrethimi dhe u larguan nën shoqërim ndërkombëtar?

46) Pse Krasniqi dhe shokët e tij nuk iu telefonuan amerikanëve kur u gjendën ngushtë, në rrethim, por i telefonuan Ali Ahmetit?

47) A nuk e kupton Krasniqi se prova më e sigurt që aventura e tij dhe e shokëve të tij nuk kishte mbështetje amerikane është mënyra mjerane, qesharake, tragjikomike, se si përfundoi kjo aventurë? Nëse kjo aventurë do të kishte mbështetje amerikane, do të kishte edhe mbështetje me inteligjencë (informata zbuluese) nga amerikanët dhe Krasniqi dhe shokët e tij nuk do të gjendeshin në situatën të cilën ai e përshkruan kështu në letrën e tij: “Ne u zumë në gjumë dhe nuk u mbrojtëm nga shfarosja, sepse mbi një mijë forca speciale me rreth 800 veta na rrethuan.”, atëherë kuptohet se ata nuk e kanë pasur mbështetjen amerikane. Sepse amerikanët, me anë të mbikqyrjes satelitore, do të kishin mësuar lëvizjen masive të forcave ushtarako-policore maqedone dhe do t’ i kishin vënë në dijeni “luftëtarët”.

48) Kur Krasniqi shkruan për ngjarjen “kjo ka qenë kryekëput kurth I përgaditur nga shërbimet sekrete të këtij shteti pa dijeninë tonë.”, çka dëshiron të thotë, që marrëveshja ishte se kurthi do të përgatitej me dijeninë e tij dhe të shokëve të tij komandantë, sipas marrëveshjes së pistë me njerëzit e Gruevskit?

49) Kur Krasniqi shkruan në letër se “Por dikush nga tanët ka bashkëpunu me këto shërbime secrete maqedonase.”, a me të vërtetë nuk e kupton ai që, nëse grupimi më i rëndësishëm i një ushtri guerrile të riaktivizuar, e cila vepron me urdhrat e një shtabi të përgjithshëm, kapet në befasi të plotë, siç e përshkruan Krasniqi më lart, atëherë përgjegjësia dhe tradhtia duhet kërkuar së pari në nivelet drejtuese të ushtrisë, te Shtabi i Përgjithshëm dhe drejtuesit e tij, si dhe te drejtuesit regjionalë të saj, të përmendur më lart prej meje, jo te ky ose ai fshatar nga Kumanova e Likova?

50) Pse Krasniqi nuk akuzon drejtuesit e UÇK-së së riaktivizuar, të cilët as i përmend me emra?

51) A mund ta mohojë bindshëm Krasniqi se ai nuk e bën një gjë të tillë për arsyen e thjeshtë se nuk ekzistojnë këta drejtues të një UÇK-je të riaktivizuar?

52) Krasniqi, duke dashur të kundërshtojë atë që është vënë re se grupi i armatosur i Kumanovës përbëhej më së shumti nga shqiptarë të Kosovës, të cilëve u dhimbeshin shqiptarët e Maqedonisë më tepër se këtyre vetvetja, thotë në letrën e tij: “Në këtë grup ka pasë më shumë shqiptarë nga Maqedonija se sa nga Kosova. Por vendorët ditën si të shmangen nga luftimet pasi që e dinin terenin, ndërsa ne u zumë nga policia maqedonase.”
Hm, në këtë rast populli, të cilit Krasniqi i adresohet në fillim të letrës, ka një thënie të urtë: “Deshi të verë vetulla por qiti sytë e vet”. Sepse del që shqiptarët e Maqedonisë, pjesëmarrës në UÇK-në e re, paskan dezertuar më së shumti, duke i braktisur vëllezërit nga Kosova. Por edhe kjo është gënjeshtër. Sepse pyetja është: Çfarë përparësie mund të ketë për një njeri njohja e terrenit, kur gjendet i rrethuar në një lagje qyteti, në atë rrethim të fortë si ai në Kumanovë? Zero përparësi!

53) Nëse vërtet të vrarët dhe të arrestuarit e grupit të Kumanovës, paskan qenë pjesa e mbetur e grupit shumë më të madh, atëherë nuk mund të mos bëhet pyetja se çfarë bënte kjo brigadë e tërë e UÇK brenda në një qytet të kontrolluar nga armiku, kur nuk kishte urdhër për të hyrë në aksion?

54) Si mund të rrijë një grupim kaq i madh guerrilas në një qytet të kontrolluar nga armiku, në një mënyrë kaq të shkujdesur, në gjumë, qartësisht pa roje, duke lejuar që të kapet në befasi të plotë?

55) Kur një grupim i madh guerrilas, shumë i armatosur, akomodohet në lagjen e një qyteti, të cilin nuk e ka nën kontroll, dhe rri në mënyrë shumë të shkujdesur, çfarë situate tjetër pret përveç kësaj që Krasniqi e përshkruan më poshtë si shumë befasuese, kur tregon për veprimet e forcave policoro-ushtarake maqedone: “Ata nuk kishin marrë urdhëra për arrestim por për eliminim fizik dhe kjo dëshmon qartë që si kanë ardhë policia kanë filluar sulmet me rafale, me bomba, me 5 automobila ,me mjete të rënda ,armë të kalibrit të madh dhe filluan edhe djegjet e shtëpive. Me çdo çmim me çdo kusht janë munduar me na eliminu ,jo me na arrestu ,ne jemi mbrojt sa kemi mundur… deri në momentin e dorëzmit tonë nga tanët janë vrarë 5 veta, gjersa një nga tanët ka bërë vetëvrasje duke mos e përballuar presionin luftarak që zhvillohej në 5-10 metra e që katet e shtëpisë sipër nesh digjeshin. Kati poshtë ku ishim, vinin zhurmat nga të gjitha kalibrat rafaleve pa ndal e nga 3-4 granata dorësh njiherësh hidheshin në drejtim tonin. Ka qenë e pamje e tmerrshme. Unë nuk kam përjetu një luftë të tillë edhe pse kam marrë pjesë në shumë beteja në Kosovë e në Maqedoni.”

56) Në cilin vend të botës ndodh që një forcë policoro-ushtarake e cila rrethon një grup guerrilas shumë të armatosur, të marrë urdhër paraprak nga eprorët për t’ i arrestuar guerrilasit, jo për t’ i asgjësuar fizikisht?

57) A nuk e paska ditur luftëtari me përvojë, Komandant “Maslisheva” se të gjithë manualet antiguerrilje udhëzojnë që për të shkurajuar përsëritjen e lëvizjeve të tilla, të jepen goditje shembullore të pamëshirshme, dhe pastaj atyre që shpëtojnë gjallë pas goditjes së parë, t’ u ofrohet mundësia të dorëzohen?

58) A mund të mohojë Krasniqi në mënyrë bindëse se, nëse ai dhe shokët e tij rrinin kaq të shkujdesur në qytetin e Kumanovës, kjo gjë ndodhte për arsye se kishin garancinë e Gruevskit dhe të shefit të shërbimeve të fshehta Mijallkov, që nuk do t’ u ndodhte asgjë e keqe?
59) A mund ta mohojë Krasniqi në mënyrë bindëse se, nëse atë dhe shokët e tij i tradhtoi dikush, ky ishte Gruevski, i cili i thirri ata të vinin në Maqedoni si mercenarë të paguar për të inskenuar një luftë, atëherë kur i duhej atij?

60) A nuk është logjike se meqënëse Krasniqi është gjallë, unë nuk besoj se ai ka qenë personalisht përfaqësues në marrëveshjen e pistë me njerëzit e Gruevskit, pasiqë, për ata të cilët ishin përfaqësues, u kujdes Mijallkovi që të mos dilnin gjallë nga rrethimi?

61) A është sjellje, jo më prej burri, por edhe prej adoleshenti të përgjegjshëm, nga ana e Mirsad Ndrecajt dhe vetë Krasniqit episodi i mëposhtëm që tregon ai në letrën e tij:

“Deri sa ne orët e dt: 9 maj mëngjes, Mirsad Ndrecaj ka bisedu me Ali Ahmetin, ka kërku prej tij mu ndal zjarri nga policia sepse mund të ketë civilë të vrarë apo mund të vriten edhe shumë të tjerë. Ali Ahmeti I ka thënë që po kqyri çka po mund të bëj e Mirsadi ka kërkuar që edhe ne të tërhiqemi e nëse është e mundur të dorëzohemi te autoritetet e Kosovës. Në këtë pyetje Aliu I ka thënë që unë nuk mundet me dhënë premtime sepse nuk u beson këtyre policëve maqedonë dhe se mund të na vrasin. Por pas kësaj bisede përveç se nuk është ndal sulmi I Policisë, këto sulme sa vinin e shtoheshin me ashpër, deri në orët e mbrëmjes.”

62) A nuk janë dy kërkesat që iu bënë Ali Ahmetit, pra armëpushim dhe heqje e rrethimit që grupi të largohej në Kosovë, pikat e marrëveshjes së fshehtë mes Mirsad Ndrecajt dhe Beg Rizajt me njerëzit e Gruevskit para se të niste kjo histori?

63) A nuk është ironi e madhe e zezë, që Ndrecaj po i kërkonte në telefon kryetarit të partisë shqiptare në pushtet në Maqedoni, që të negocionte me autoritetet maqedone, sipas termave të marrëveshjes së fshehtë që ata kishin bërë me njerëzit e Gruevskit, dhe që tashmë ishte shkelur nga Gruevski!!!

64) A nuk është absurd që Ndrecaj po i kërkonte Ali Ahmetit, që praktikisht të merrte atributin e përfaqësuesit politik të grupit të rrethuar në Kumanovë, kur Ahmeti nuk kishte dhënë pëlqimin për këtë që po bënin ata?

65) A nuk ështe sjellje prej adoleshentësh të vonuar mendërisht që “komandantët” kërkonin që të luhej teatri luftarak sipas marrëveshjes së fshehtë me njerëzit e Gruevskit, kur tashmë ishte e qartë se marrëveshja ishte shkelur?

66) Çfarë arsye do të kishte shteti maqedon që të pranonte këto kërkesa të “komandantëve”, kur për këtë gjë nuk kishte një presion ndërkombëtar, do të thotë amerikan?
Sipas fantazisë së Mirsad Ndrecajt dhe Muhamet Krasniqit, shteti maqedon duhet t’ i pranonte kërkesat e tyre, ndryshe do të vriteshin civilë dhe njerëz të tjerë.

67) A thua nuk e kuptonte Mirsad Ndreca dhe shokët e tij se në kështu kuptohej se donin të thoshin që strategjia e tyre kur u dislokuan në një lagje qyteti, kishte qenë që t’ i përdornin banorët civilë si mburoja njerëzore?

68) A thua nuk e kuptonte Mirsad Ndreca dhe shokët e tij të ardhur nga Kosova se në këtë rast përgjegjësia për dëmtimin e popullsisë civile mbetej mbi ta, nëse e vazhdonin qëndresën?

69) A nuk e kupton letërshkruesi se shteti shqiptar ka detyrim të bëjë atin e shqiptarëve, pavarësisht se ku gjenden, por jo të aventurierëve të tillë?

70) A nuk është burrëri, zotëri Krasniqi, që së paku tani të thuhet e vërteta, e jo të vazhdohet me rrena e ankime si të Sallangjakut të këngës për hapsanen.

Publikuar: 01.02.2016 | 14:49
Lexuar: 855 herë
Printo PDF format Shto në,..

Komentet

Ndalohet përdorimi i gjuhës denigruese dhe fjalëve ofenduese ndaj individëve dhe ndaj grupeve specifike, si dhe komentimet që s`kanë të bëjnë me temën e artikullit. Moderatorët mbajnë të drejtën e fshirjes së komenteve që thyejnë rregullat e komunikimit.
Emri:
Email adresa:
Komenti:















Developed by: Just5 Studio
Rss furnizime