Afirmimi dhe popullarizimi më i madh i zejeve dhe krijimi i modeleve për qëndrueshmërinë e tyre është temë kryesore e konferencës së sotme për përkrahjen e zejeve tradicionale dhe potencialeve socio-ekonomike në komunën e Çairit dhe komunën e Gjilanit, që u mbajt në Shkup.

Fokusi kryesor i konferencës, siç njoftojnë nga Zyra për informim e komunës së Çairit, janë zejet dhe rëndësia e tyre në shoqërinë bashkëkohore dhe potenciali i tyre në drejtim të zhvillimit të ndërmarrësisë sociale.

Në konferencë u potencua rëndësia e Çarshisë së Vjetër të Shkupit si shtyllë e zejeve tradicionale, ndërsa njëkohësisht u potencua edhe rëndësia e krijimit të modeleve të cilët do të mundësojnë popullaritet më të madh të zejeve dhe rendimin bashkëkohor të përmbajtjeve të cilat i ofron Çarshia.

Gjithashtu u prezantuan potencialet dhe projektet rrjedhëse për zhvillim të zejeve tradicionale në Çarshinë e Vjetër, si dhe përvojat nga disa tregime të suksesshme të Çarshisë.

"Çarshia e Vjetër e Shkupit është zemra e Komunës së Çairit dhe pjesa e saj më vitale si nga aspekti ekonomik po ashtu edhe ai shpirtëror. Këtu krijohen aktivitetet më të rëndësishme ekonomike në komunë dhe çka është edhe më e rëndësishme transferohet në gjeneratat e ardhshme një traditë e këtillë. Për këtë shkak përkrahja e zejeve dhe nxitja e të rinjve që të merren me zeje të caktuara ngel prioriteti ynë", theksoi kryetari i komunës së Çairit, Izet Mexhiti.

Në korniza të këtij projekti Komuna e Çairit ndau 20 grante nga 2.000 euro veçmas, mjete të pakthyeshme, për renovimin e fasadave të vitrinave.

Përkrahja e zejeve si simbol tradicional i frymës së ndërmarrësisë të këtyre hapësirave është edhe një nga prioritetet e Ministrisë së Ekonomisë të Republikës së Maqedonisë.

"Zhvillimi i frymës së ndërmarrësisë veçanërisht tek të rinjtë është një inspirim jashtëzakonisht i rëndësishëm në zhvillimin e ekonomisë nacionale. Pikërisht tek zejet kjo frymë e ndërmarrësisë është e gjallë dhe ne nëpërmjet programeve të ndryshme dhamë përkrahje konkrete për zhvillimin e tyre të mëtutjeshëm. Ju bëj thirrje të rinjve të mendojnë sa më tepër për potencialin e zejeve dhe të inkurajohen për të filluar këto biznese", theksoni Bekim Neziri, ministër i Ekonomisë i Republikës së Maqedonisë.

Në konferencë mori pjesë përfaqësuesi i artarisë "Xhelo", Pane Temov pronar i disa lokaleve mes tyre edhe i pijetores më të njohur "Star Grad", përfaqësuesi i "Pela Antik", dyqani i zejtarisë i cili përpunon suvenire për turistët dhe kreatori i modës me përvojë internacionale, Izet Curi.

Konferenca është në korniza të projektit për valorizimin e zejeve tradicionale dhe potencialeve socio ekonomike të komunave Çair dhe Gjilan, si pjesë e Programit të Bashkimit Evropian për bashkëpunim ndërkufitar në mes Maqedonisë dhe Kosovës.

Projekti për përkrahjen e zejeve është përkrahur nga Bashkimi Evropian në drejtim të bashkëpunimit më të madh. Në konferencë mori pjesë edhe përfaqësuesi i delegacionit të Bashkimit Evropian në Shkup, Jaromir Levicek dhe nënkryetari i komunës së Gjilanit, Rexhep Kadriu.