"Gazprom"-i ka filluar sot të dërgojë gaz për në Evropë, deklaroi kryeministrja ukrainase Julia Timoshenko. Ajo e dha deklaratën në Moskë para se të niset për në Kiev pas negociatave të djeshme.

"Në orën katër sipas kohës së Moskës "Gazprom"-i lëshoi gaz për në Evropë. Ne ishim në pikën dispeçere", theksoi Timoshenko.

Sipas ekspertëve nevojiten 36 orë që të punojë tërërsisht sistemi i transportimit të gazit për në Evropë. Një pjesë e ekspertëve të tjerë mendojnë se që të arrijë gazi deri tek konsumatorët evropian duhen tri ditë.

Më 7 janar Rusia i ndërpreu të gjitha dërgesat e gazit përmes Ukrainës duke e akuzuar se në mënyrë të padrejtë shfrytëzon gazin rus i cili dërgohet për në Evropë.

"Naftogaz"-i i Ukrainës dhe "Gazprom"-i dje nënshkruan marrëveshje 10-vjeçare për dërgesën e gazit rus për në Ukrainë dhe për tranzit deri tek konsumaorët evropian. Me siguri, Kievi sivjet do të paguajë nga 235 dollarë për një mijë metra kub gaz.