Trajneri i Sandërlendit, Stiv Brus, tha se ata do ta përballojnë kampionatin anglez edhe pa ish-kapitenin Lorik Cana. Mesfushori shqiptar kaloi në mënyrë surprizë te Gallatasarai.

Brus tha për “The Journal”: “Unë mendoj se jam ‘Ok’ në mesfushë, pasi ne kemi marrë Kristian Riveros, i cili ka ardhur për të zëvendësuar Lorik Canën dhe, nëse do të tregohem i ndershëm, Loriku ndoshta e përballoi me intensitet fizik Premier League.

Jam duke kërkuar të fuqizoj zonat e tjera. Unë nuk mendoj se mesfusha është një prioritet. Ne kemi marrë Hendersonin dhe Mejlerin, të cilët patën një impakt të madh sezonin e kaluar dhe gjithashtu morëm Xhek Kolbek në skuadër. Jam i impresionuar me këta djem të rinj”.

Fjalët e mira për Canën nga ish-trajneri i tij te Sandërlendi, janë një sinqeritet i këtij të fundit, edhe pse ka deklaruar se nuk do ta ndiejë mungesën e largimit të tij.