Vazhdohet afati për regjistrimin e makinave që janë importuar nga jashtë dhe që kanë standard Euro 1. Lajmi sot u konfirmua edhe nga Qeveria.

Kjo do të thotë që në vend që deri nesër të përfundonte afati për regjistrimin e makinave që janë importuar nga jashtë dhe që i plotësojnë standardet e EURO 1, tani pronarët e tyre, do të kenë kohë që këtë procedurë ta kryejnë deri në mbarim të shtatorit të këtij viti. Pas këtij afati gjatë 6 muajve të ardhshëm do të vlejnë standardet Euro 2 e pastaj vetëm Euro 3.

Sot në stacionet për kontrolle teknike nëpër Shkup, qytetarët megjithatë nxitonin që t’i kryenin regjistrimet e makinave të importuara.

“Po presim prej orës 9 që, dy orë”. “Nuk pritet shumë, shumë mirë po kalojmë”, kështu shprehen qytetarët e anketuar.

Nga drejtoria e Doganave të Maqedonisë konfirmojnë se javën e fundit është rritur dyfish numri i makinave të importuara, kurse prej janarit e deri më sot janë zhdoganuar 32 mijë makina të përdorura. Mirëpo paralajmërojnë se pas këtij afati do të ketë kontrollime dhe gjoba për të gjitha makinat me targa të huaja.

“ Lloji i këtillë i makinave që drejtohen mbi 6 muaj gjatë viteve të fundit paraqet kundërvajtje doganore që gjithsesi gjobitet. Për personat fizik gjoba është 100 euro me mundësinë e pagesës aty për aty për 50 euro.

Mirëpo më pas pason procedura e zgjidhjes së gjendjes me makinën me çka makina ndalet kurse pronari duhet të filloj procedurën për legalizimin e makinës, ose madje për kthimin e saj në vendin ku e ka blerë. Nëse nuk ndërmerren masa brenda këtij afati, atëherë mund edhe të bëhet konfiskimi i makinës”, tha Vanço Kargov, Drejtor i Doganave të Maqedonisë.

Nga MPB-ja thonë se pas skadimit të afatit të vazhduar do të pasojnë kontrollime rigoroze nëpër qytetet e vendit.

“MPB do të bëj kontrollime intensive nëpër rrugët e vendit. Makinat do të ndalen dhe kontrollohen. Nëse vërehen dokumente jo përkatëse që nuk përputhet me dispozitat ligjore për drejtimin e makinës, e njëjta do të jepet në procedurë doganore”, tha Ivo Kotevski, zëdhënës i Ministrisë së Brendshme

Ligji i ri për importin e makinave të përdorura u miratua në muajin mars të këtij viti. Me këtë ligj pritej edhe regjistrimi i 30 mijë makinave ma targa bullgare. Të dhënat konkrete se sa nga këto makina janë regjistruar nuk ka, por kompetentët thonë se numri është shumë i vogël.