Organizata Humanitare EL HILAL rrumbullakoi projektin “Synetimi i fëmijëve 2010”, me të cilin ishin përfshirë 200 fëmijë nga popullata ekonomikisht e rrezikuar e Shkupit, Kumanovës, Velesit dhe Prilepit. Me këtë projekt dëshirohej që të bëhet e mundur kryerja e këtij akti fetar dhe human mbi fëmijët nga familjet që nuk kanë kushte për këtë.

Të gjitha shpenzimet nga projekti i sivjetëm, duke filluar nga sigurimi i rrobave për fëmijë dhe dhuratat për anëtarët e e familjeve, ishin siguruar nga ana e komunës Osmangazi të Bursës, Republika e Turqisë.

Me këtë rast, në parkun e Çairit, të përgatitur enkas për këtë rast, ishte organizuar një manifestim me program kulturor-artistik dhe fetar, ku ishin paraqitur ligjërata dhe fjalime të rastit, ndërsa në fund parakaluan fëmijët në rroba tradicionale të synetimit.

Në këtë eveniment, morën pjesë me këngë dhe valle ansamblet Karshijaka nga Shkupi dhe Zafer nga Bursa, ndërsa mysafirëve iu drejtuan teologët Mustafa Kara dhe Ali Sadiku, të cilët folën për rëndësinë e këtij akti fetar dhe human.

Mysafirët i përshëndeti edhe kryetari i EL HILAL-it, Behixhudin Shehapi, kryetarët e Çairit dhe Osmangazit, Izet Mexhiti dhe Mustafa Dyndar dhe ai i qytetit Bursa, Rexhep Alltepe.

Në fund, ishin ndarë mirënjohje përkatëse për të gjithë që kontribuuan për realizimin e suksesshëm të kësaj ngjarjeje tradicionale.