Amerika ka përgatitur rezolutën e saj pas mendimit të GJND-së për Kosovën në të cilën në thelb kërkohet të bisedohet në mes të Prishtinës e Beogradit dhe i jepet fund statusit të Kosovës. Uashingtoni ende nuk ka vendosur nëse do ta paraqes vet rezolutën apo përmes ndonjë shteti mik, si për shembull Shqipëria, shkruan e përditshmja serbe “Blic”.

Gazeta shton se në Asamblenë e Përgjithshme, përveç tjerash, sa i përket Kosovën, nuk duhet pritur ndryshim të qëndrimit të deritanishëm të SHBA-ve.

“Uashingtoni do të vazhdojë të insistojë që Beogradi ta ndryshojë rezolutën jo vetëm ku thuhet se shkëputja e Kosovës është e papranueshme, por edhe fjalinë ku kërkohen bisedime për “të gjitha çështjet e hapura””, shkruan “Blic”, duke iu referuar një analisti në Uashington, Obrad Kesiq.

“SHBA-të do të tentojnë ta bindin Serbinë ta ndryshojë rezolutën, e në rast se kjo nuk ndodhë, ata kanë përgatitur versionin e tyre. Më e mundshmja do të jetë që rezolutën ta paraqes ndonjë shtet mik i Amerikës sepse në këtë mënyrë mund të marrin më shumë vota “pro” pasi që ka shtete që votojnë automatikisht kundër çdo gjëje që propozon Amerika”, ka thënë Kesiq për “Blic”.