Ardianë Pajaziti

Prishtina, Mitrovica dhe Prizreni janë vendet nikoqire të kursit ndërkombëtar të muzikës kamertale “Colluvio 2010”, që do të mbahet në javën e fundit të muajit gusht. Nën organizim të austriakëve dhe pas performancave edhe nëpër shtete të tjera, ky kurs do të zbret edhe në Kosovë, për të futur në listën e instrumentistëve edhe tre muzikantë kosovarë.

Sipas organizatorëve, mësohet se kursi ndërkombëtar do të nisë me Prishtinën, më 23 gusht i cili do të mbahet në Teatrin Kombëtar të Kosovës, për të vazhduar më pas me Mitrovicën, në qendrën e kulturës “Rexhep Mitrovica”, në Mitrovicë, dhe për ta përmbyllur këtë prezantim me Prizrenin, ku artistët vendorë dhe ndërkombëtarë do të prezantohen në shkollën e muzikës “Lorenc Antoni”, në Prizren.

Tre artistët kosovarë të cilët do të marrin pjesë në këtë kurs ndërkombëtarë janë të shoqëruar edhe nga artistët e tjerë nga Austria, Serbia e Gjermania. Pjesëmarrës të kësaj ngjarje janë këta muzikantë: Neritan Hysa (Piano) - Kosovë, Mira Possert (Violinë) – Austri, Nenad Uskoković (Violonçel) – Serbi, Sanja Spasiq (piano) – Serbi, Erlinda Gashi (Violinë) – Kosovë, Sabeth Quitt (violonçel) – Gjermani, Marija Deskovi (piano) – Serbi, Visar Kuçi (Violinë) – Kosovë dhe Victor Plumettaz (Violonçel) – Gjermani. Të gjitha koncertet do të mbahen në ora 20:00.