Zëvendëskryeministri i Republikës së Shqipërisë, njëherit edhe Ministër i Punëve të Jashtme, z. Ilir Meta i ka dërguar letër Kryetarit të Demokracisë së Re, z. Imer Selmani, me ç’rast e ka falenderuar për takimin që realizuan gjatë vizitës zyrtare të z. Meta në Republikën e Maqedonisë.

“Kam kënaqësinë e veçantë që, pas kthimit tim nga vizita në Maqedoni, t’Ju përshëndes dhe t’Ju përcjell falenderimet e mia të përzemërta dhe të sinqerta për takimin vëllazëror që më rezervuat mua dhe delegacionit që më shoqëroi, në të cilin patëm rastim të shkëmbejmë mendime të vlefshme për zhvillimet më të fundit në Maqedoni, Shqipëri dhe në rajon” shkruan z. Meta.

Më tej, z. Meta shpreh bindjen e tij se Demokracia e Re nën drejtimin e Selmanit do të vazhdojë të japë kontributin e saj konstruktiv në realizimin në kohë dhe me sukses të Marrëveshjes së Ohrit, si mekanizëm bazë për përmbushjen e aspiratave të shqiptarëve për barazi, progres e mirëqenie, si dhe në forcimin e bashkëpunimit midis dy vendeve.