Afro 10 kg lëndë narkotike u bllokuan në orët e para të ditës së sotme nga policia, ndërsa dy shtetas, njëri nga të cilët shqiptar i Maqedonise, u arrestuan nën akuzën për trafikim të lëndëve narkotike, njoftuan burime të Drejtorisë së Policisë së Qarkut të Gjirokastrës.

"H. Sh., 35 vjeç, nga Shkupi (Maqedoni) dhe A. C., 20 vjeç, nga Gjirokastra, u arrestuan teksa po udhëtonin në rrugën kombëtare Gjirokastër-Tepelenë, me mjetin furgon tip "Opel", me targa SK 339 PT", theksuan burimet e policisë.

"Lënda narkotike e ndarë në 8 pako në formë cilindrike, e siguruar në fshatin Lazarat, ishte fshehur në gomën rezervë të mjetit, në pjesën e pasme dhe kishte destinacion Maqedoninë", thanë burimet zyrtare.

Gjatë këtij viti forcat e policisë së Qarkut të Gjirokastrës kanë zhvilluar 22 operacione, duke bërë të mundur sekuestrimin e rreth 2 tonë marihuane si dhe arrestimin në flagrancë të 25 vetëve.