Lëvizja qytetare "ZGJOHU!" ashpër e dënon deklaratën e ministrit serb të Punëve të Brendshme Ivica Daçiq, i cili gjatë takimit me kolegen e tij nga Maqedonia Gordana Jankuloska deklaroi se Republikën e Kosovës e llogarit si pjesë përbërëse të Serbisë.

Lëvizja "ZGJOHU!", siç thuhet në kumtesë, vlerëson se jokomentimi nga ana e Jankulloskës në këtë deklaratë të kolegut të saj serb, paraqet miratimin e agresionit verbal të Daçiqit ndaj Republikës së Kosovës, shtet fqinj, të cilin Maqedonia e ka pranuar dhe me të cilën ka vendosur marrëdhënie diplomatike.

"Lëvizja 'ZGJOHU!' i përkujton të gjithë ata që ende janë në mëdyshje me realitetin e ri në Ballkanin Perëndimor se pavarësia e Republikës së Kosovës është e pandryshueshme, e përkrahur nga të gjithë shqiptarët kudo që të jenë dhe e konfirmuar nga ana e Gjykatës ndërkombëtare të Drejtësisë, Asamblesë së përgjithshme të Kombeve të Bashkuara dhe e njohur nga shumica dërmuese e demokracive botërore", thuhet në kumtesën e lëvizjes "ZGJOHU!".

Lidhur me temën e bisedimeve mes dy ministrave rreth lëvizjes së lirë të qytetarëve me me letërnjoftime në vendkalimet kufitare mes Serbisë dhe Maqedonisë, "ZGJOHU!" vlerëson se prioritet i Maqedonisë është vendosja sa më e shpejtë e marrëveshjeve të tilla me Shqipërinë dhe Kosovën për shkak të përparësive, duke përfshirë lidhjet familjare mes shqiptarëve në rajon, këmbimit tregtar me këto vende, si dhe përparësisë së shfrytëzimit të portit shqiptar në Durrës dhe atë kosovar në Shengjin përmes autostradës së Kombit, si dhe shumë përparësi tjera.