Administrata e presidentit të SHBA-së, Barak Obama e shtyu për një ditë shpalljen e planit të shumëpritur për shpëtimin e bankave dhe u bëri thirrje ligjdhënësve t'i tejkalojnë dallimet për pakon e madhe për stimulimin e ekonomisë, transmetuan agjencitë botërore.

Ministri i Financave i SHBA-së, Timoti Gajtner nesër do t'i paraqesë pikat kryesore të planit, kumtoi Ministria e Financave.

Paraprakisht ishte kumtuar se Gajtner sot do t'i prezantojë masat e reja. Shtyerja është bërë në mënyrë që Senati, para votimit të martën, ta shqyrtojë planin për ndihmë të ekonomisë, vërejtën agjencitë.

Plani për stimulim të ekonomisë dhe shpëtim të bankave është element kyç i strategjisë së presidentit Barak Obama për ballafaqim me krizën më serioze financiare në SHBA, që nga koha e Depresionit të madh.

Gajtner duhet të kumtojë se si administrata e re planifikon t'i shfrytëzojë 350 miliardë dollarët e mbetur nga programi për ndihmë sistemit financiar në vlerë prej 700 miliardë dollarësh.