Në kuadër të përpjekjeve për ruajtjen e vlerave autentike nga trashëgimia jonë e pasur kulturore, si dhe përforcimit të bashkëpunimit ndërinstitucional, sot në mes Qendrës Nacionale për Konservim (QNK) dhe Shoqatës së Historianëve Shqiptarë është nënshkruar një marrëveshje për realizimin e projektit të dedikuar për Muzeun e lirisë.

Projekti me titull “Dhoma tradicionale aristokrate” ose dhoma shqiptare e mysafirëve që do të ndërtohet në njërën nga hapësirat e këtij muzeu, ka për qëllim kthimin e vlerave autentike të shtëpisë së Jashar Beut, e cila është adaptuar në një muze i mbrojtur me ligj.

Në të vërtetë, kthimi i traditës, ripërtëritjes së pjesës së vjetër të Shkupit, arritja e funksionalitetit të muzeut, janë objektivat kryesore të këtij projekti që është përkrahur financiarisht nga Këshilli i qytetit të Shkupit.

Duke nënshkruar këtë marrëveshje për bashkëpunim për realizimin e projektit të arkitekturës së vjetër profane, përkatësisht qytetare, drejtori i QNK, Behixhudin Shehapi dhe kryetari i Shoqatës së Historianëve Shqiptarë, Skender Asani, theksuan se ky bashkëpunim institucional edhe në të ardhmen do të zhvillohet me realizimin e më shumë projekteve që janë në funksion të kthimit të vlerave ndërtuese tradicionale të qytetit në veçanti revitalizimit të Çarshisë.

Në ambientet e këtij muzeu do të inkorporohen elemente të arkitekturës së vjetër qytetare karakteristike për enterierin, përkatësisht të gdhendjes së thellë të drurit, rafteve, mindereve, musendrave, dhomave të pritjes, si dhe aplikime nga guri, hekuri, bakri etj.

Projekti do të finalizohet deri në Kurban Bajram, kur pritet të organizohet edhe një solemnitet tradicional të Bajramit.