- Dyzet persona kanë humbur jetën, ndërsa 12 janë lënduar rëndë në përplasjen e autobusit dhe trenit në Ukrainë, deklaroi zëdhënësi i hekurudhës ukrainase.

Aksidenti ka ndodhur në mëngjesin e sotëm në vendkalimin Nikopoll-Marganec në rajonin Dnepropetrovska. Të gjitha viktimat kanë udhëtuar me autobus.

Presidenti ukrainas Viktor Janukoviç e shpalli ditën e nesërme për ditë zie në vend.

Në kumtesën e hekurudhës thuhet se ka qenë i kyçur sinjalizimi, i cili ka treguar se kalimi për lëvizje është i mbyllur.

Hetimi tregoi se sinjalizimi i kalimit ka funksionuar, ndërsa dukshmëria në të dy drejtimet ka qenë rreth 700 metra.

Sipas të punësuarve në hekurudhë, shkaktar për aksidentin ka qenë autobusi i cili ka tentuar të kalojë pa i kushtuar vëmendje sirenës së trenit.

Kryeministri Mikolla Azarov deklaroi se Qeveria do t'u paguajë familjeve të viktimave nga 9.100 euro. Ai ka kërkuar nga ministri i Transportit dhe Lidhjeve, Konstantin Efimenko të shkojë në vendin e fatkeqësisë dhe të inkuadrohet në punën e Komisionit, i cili kryen hetim për shkaqet, ndërsa drejtohet nga zëvendëskryeministri Andrej Kluev.