- Vendet-anëtare të Katërshes së Vishegradit (V4) në takimin e sotëm në Bratisllavë shprehën mbështetje të fuqishme për vendet e Ballkanit Perëndimor në përpjekjet e tyre për integrim në Bashkimin Evropian.

Ministrat e punëve të jashtme të Sllovakisë, Hungarisë, Polonisë dhe Çekisë u dakorduan se interes i tyre i përbashkët strategjik është zgjerimi i mëtejshëm i BE-së.

Shefi i diplomacisë sllovake Mikulash Xurinda deklaroi se vendet e Ballkanit Perëndimor duhet të plotësojnë kritere të caktuara që të hynë në Union.

"Ne e dimë se çka do të thotë të realizohen kriteret, kjo nuk është e lehtë, por me ndihmën e miqve kjo mund të arrihet", theksoi Xurinda në konferencën për shtyp pas takimit.

"Zgjerimi i BE-së është një prej prioriteteve të V4. Hungaria dhe Polonia do t'u përkushtojnë kësaj vëmendje të posaçme gjatë vitit 2011, kur do të jenë vende-kryesuese të BE-së", thuhet në kumtesën e përbashkët të V4, e cila është themeluar në vitin 1991 në Hungari.