Klubi i mërgimtarëve nga fshati Debresh me seli në Cyrih të Zvicrës, në mbledhjen e fundit mori vendim për grumbullimin e 50 mijë eurove, mjete këto të cilat do të shfrytëzohen për sigurim të ujit të pijshëm në fshatin e tyre të lindjes Debresh.

Kjo vjen si rrjedhojë e takimit të mëparshëm të mbajtur në muajin gusht me kryetarin e komunës së Gostivarit prof.dr. Rufi Osmani. Gjatë atij takimi u ra dakord që nga shuma e përgjithshme prej 150 mijë euro sa është kostoja e këtij projekti, klubi në emër të qytetarëve të fshatit Debresh të financojë 50 mijë euro, ndërsa pjesën tjetër prej 100 mijë euro, ta mbulojë komuna e Gostivarit.

Në bazë të përllogaritjeve fillestare të inxhinierëve të Komunës, ky projekt do të duhet të mund të fillojë të realizohet nga muaji maj i vitit të ardhshëm, ndërsa do të mund të përfundojë në korrik të vitit 2011. Problemi me ujin e pijshëm në fshatin Debresh është një problem i kamotshëm , ndërsa vlen të theksohet se përbërja e mëparshme komunale në prill të vitit 2008, për qëllime të marketingut politik, solemnisht promovoi fillimin e punimeve për ndërtimin e ujësjellësit, gjë që realisht nuk e bënë kurrë.

Kryetari Osmani, ashtu siç u premtoi mërgimtarëve, ditëve në vijim do ta vizitojë Klubin “Debreshi” në Zvicër, gjatë pjesëmarrjes në Forumin “Crans Montana”.