Lista “LDK –Dr. Ibrahim Rugova” është në proces të hartimit dhe deri në fund të javës do të bëhet e ditur lista komplete prej 120 kandidatëve që do të garojnë për zgjedhjet nacionale në Kosovë. Astrit Haraqija një nga iniciatorët e këtij fraksioni brenda LDK-së bën të ditur se deri në fund të javës do të dihen emrat bartës të listë “LDK – Dr.Ibrahim Rugova”. Sipas tij ka një interesim të madh të ithtarëve rugovianë që të rreshtohen në këtë listë të cilës i prin Ukë Rugova e që pasohet nga Bujar Bukoshi, Ali Lajçi, Fadil Kryeziu, Astrit Haraqija e të tjerë.

Fraksioni “LDK- Dr.Ibrahim Rugova” me Ligjin për zgjedhjet ka të drejtë të garojë në zgjedhjet nacionale si iniciativë qytetare. Ky fraksion ka shprehur shqetësimet dhe pakënaqësitë e veta për zgjedhjet e brendshme në LDK, ndërkaq si alternativë për të ruajtur votën e LDK-së dhe në përpjekje për të rikthyer anëtarësinë rugoviane të LDK-së ka themeluar fraksionin “LDK- Dr.Ibrahim Rugova”.