- Përkrahje më të madhe nga Qeveria dhe institucionet shtetërore dhe stërvitje për historianë të rinj, posaçërisht në sferën e arkeologjisë, kërkoi sot shoqata e historianëve shqiptarë në Maqedoni.

Këtë e kumtoi zëvendës-kryetari i Qeverisë Abdilaqim Ademi pas takimit me udhëheqësinë e re të kësaj Shoqate.

"Në Maqedoni ka pak shqiptarë arkeologë, por këtë vit kanë diplomuar pesë arkeologë. Vlerësoj se në të ardhmen ata duhet t'i punësojmë në Muzeun e Maqedonisë, me qëllim që edhe ata të përfshihen në gropimet arkeologjike, të cilat po realizohen në shtet", tha Ademi.

Zëvendëskryetari Ademi informoi se kanë biseduar për projektet e përbashkëta, të cilat në të ardhmen do të mund t'i kenë Sekretariati për implementimin e Marrëveshjes së Ohrit dhe Shoqata e historianëve shqiptarë në Maqedoni.

Sipas tij, kjo Shoqatë ka dhënë kontribut të madh për aktivitetet në Maqedoni, posaçërisht për ngjarjet të cilat janë të lidhura me historinë shqiptare. Ademi theksoi se ka garantuar përkrahje të projekteve të Shoqatës të historianëve shqiptarë në Maqedoni.