Me një minutë heshtje në nderim të profesorit Zeqir Demit, i cili ndërroi jetë dy ditë më parë, ka nisur promovimi i librit “Arsimi shqip në Kosovë 1990 – 1999”, i Bajram Shatrit, me nëntitullin “Shtëpitë shkolla - Sfidat, arritjet dhe aspiratat”, i mbajtur dje në BKUK.

Në këtë monografi trajtohet çështjet rreth organizimit dhe zhvillimit të mësimit në periudhën 1990 – 1999 në kushtet dhe rrethana të jashtëzakonshme – në lokalet shtëpi private në të gjitha nivelet e arsimit në mbi 3.200 shtëpi.

Folësit në këtë promovim vlerësuan lart punën e bërë nga Bajram Shatri në ndriçimin e njërës nga periudhat më të rëndësishme të arsimit në Kosovë, periudhë kjo që nga të pranishmit u konsideruar edhe si mrekullia e rezistencës kosovare.

Prof.dr. Hajredin Kuçi, zv/kryeministër në dorëheqje i Kosovës, ka pohuar se ky libër është një dokument i rëndësishëm që hedh dritë në mbijetesën e arsimit shqip në vitet 1990-1999. Folën edhe Xhevat Syla prof.dr. Hajrulla Koliqi dhe Halim Hysen.