Seb Bytyçi

Para dy mijë vjetëve ishte paraqitur një njeri në Jude që shihej si shpëtimtar i njerëzimit. Hebrenjtë besonin se një ditë do të vijë një shpëtimtar (Mesia) që ta shpëtojë njerëzimin nga të këqijat. Kur lindi Isa (Jezusi, i njohur si biri i Zotit nga të krishterët dhe si profeti Isa ose hazreti Isa nga myslimanët), disa nga hebrenjtë besuan se ky ishte shpëtimtari. Ata më vonë u quajtën të krishterë.
Kur u paraqit z. Isa Mustafa, si fitues i Prishtinës dy herë me radhë, shumë militantë e simpatizantë të LDK-së e panë atë si shpëtimtar të LDK-së. Mirëpo, pyetja është se nga çfarë duhet ta shpëtojë LDK-në z. Mustafa? LDK-ja nuk vuante vetëm nga rënia e popullaritetit të liderit të saj të mëparshëm z. Sejdiu. Ajo, si edhe partitë e tjera në Kosovë, vuan një sistem klientelist ku njerëzit nuk përparojnë në bazë të meritokracisë, por në bazë të marrëdhënieve patron-klient që mbizotërojnë jo vetëm brenda partive, por edhe në tërë shoqërinë kosovare. Andaj, puna e vështirë sapo ka filluar për z. Mustafa. Dhe ajo nënkupton instalimin e një demokracie të mirëfilltë brenda partisë.

Zgjedhjet nacionale

Ka edhe qytetarë që s’janë me LDK-në që e shohin z. Mustafa edhe si shpëtimtar të Kosovës. Të ngazëllyerit me Isën nuk harxhojnë asnjë sekondë për të kontrolluar rekordin e tij të menaxhimit të Komunës Prishtinës. Dhe, janë të prirë të mendojnë se ai mund t’i fitojë zgjedhjet e përgjithshme me LDK-në.
Mirëpo, afati i shkurtër nga zgjedhja e tij në krye të partisë deri te zgjedhjet e përgjithshme nuk e garanton një gjë të tillë. Qasja jokonfrontuese e z. Mustafës dhe pritja deri në momentin e fundit për kandidim për kryetar të partisë ka ulur pak entuziazmin për të. Pritja e tij e gjatë mund të jetë vendimtare për rezultatin e zgjedhjeve.

Kthimi nga vetvetja

Kjo qasje i vë në dyshim edhe pritjet se z. Mustafa mund të bëjë ndryshime të rëndësishme në LDK. Prandaj, nëse ai do të dëshmohet si shpëtimtar i LDK-së, ai duhet të fillojë të merret me të menjëherë pas zgjedhjeve të përgjithshme të dhjetorit 2010. Qysh në fillim të vitit 2011, duhet të fillojë një rishikim i statutit të LDK-së për të garantuar demokraci të brendshme. Si dhe duhet të fillojnë përgatitjet për zgjedhjet e reja brendapartiake. Nëse Isa dëshiron ta shpëtojë LDK-në, ajo parti nuk duhet të shkojë në zgjedhjet e ardhshme lokale pa një proces të mirëfilltë demokratik e meritokratik brendapartiak. Kjo mund të nënkuptojë që z. Mustafa duhet të heqë dorë nga qasja e tij jokonfrontuese.

(Autori është drejtor ekzekutiv i Institutit Ballkanik të Politikave - IPOL. Pikëpamjet janë personale)