Debati filozofik mes Lindjes dhe Perëndimit zbret edhe në Tiranë, duke ofruar një mundësi më shumë në forcimin e dialogut ndërkulturor dhe ndërfetar në Shqipëri. Në kuadrin e “Ditës Ndërkombëtare të Filozofisë”, dhe “Vitit të Afrimit të Kulturave”, shpallur nga UNESCO, fondacioni “Rumi” mblodhi dje filozofë, studiues, akademikë shqiptarë e nga vende të ndryshme të botës, përfshi edhe studiues nga Irani, për të diskutuar argumentin “Filozofia dhe Shkenca në Kulturën Perëndimore dhe atë Lindore”.

Referuan Prof. Dr. Shahram Pazouki, profesor i Institutit Iranian të Filozofisë dhe Prof. Dr. Gjergj Sinani, Përgjegjës i Departamentit të Filozofisë, Universiteti i Tiranës, akademiku Alfred Uçi, Prof. Dr. Muzafar Iqbal, kryetar i Institutit Kanadez për Islamin dhe Shkencën. Disa nga temat e diskutuara ishin: Filozofia dhe zhvillimet bashkëkohore; Mendimi Filozofik në Shqipëri; Filozofia dhe krizat e mjedisit; Parimet bazë të Filozofisë në kulturën perëndimore dhe atë lindore; Perceptimi Filozofik i Shkencës në Qytetërimin Modern, Kriza e Botës Moderne në këndvështrimin e filozofëve orientalë etj.

“Çdo qytetërim, – tha për mediat drejtori i fondacionit “Rumi”, z. Seyed Amir Asghari, – ka vulën e mendimit filozofik e shkencor të kohës. Çdo qytetërim ka të përbashkëta e dallime me të tjerët, bashkëkohës a pararendës, pikërisht falë qasjeve filozofike të ndryshme në hapësira e kohë të ndryshme. Njohja e tyre i shërben respektimit të ndërsjelltë të vlerave që sjellin në histori, si dhe një bashkëveprimi sa më të frytshëm midis tyre”.

Ndërsa prof. Gjergj Sinani nga universiteti i Tiranës nënvizoi mesazhin se ndryshimet në kulturë, në konceptet filozofike apo ato fetare nuk mund të nënkuptojnë, prodhojnë apo justifikojnë konflikte, përkundrazi, ato plotësojnë njëra-tjetrën, afrojnë më shumë me të vërtetën, duke e bërë botën më të larmishme dhe më interesante”.