Gjergji Mima

- Pas triumfit në Shkup, në edicionin e 40-të të turneut prestigjioz ndërkombëtar të boksit "Gongu i Artë", ku Shqipëria mori një medalje të artë me boksierin Xhuljo Vrenzoi në peshën 64 kg, tekniku i ringut kuqezi, Zef Gjoni, i beson një tjetër suksesi në arenën ndërkombëtare.

Nga 24-28 nëntor Shqipëria do të marrë pjesë në turneun e radhës "Doreza e Artë" me nëntë boksierë.

"Në eventin e fundit ne kemi bërë një prezantim tepër dinjitoz, pse jo më të mirin, ndryshe nga herët e tjera, dhe në fund u kurorëzuam me meritë me medalje të artë. Realisht ka qenë një eksperiencë e bukur.

Me po kaq ambicie do të nisemi edhe në turneun e radhës në Beograd, në 'Dorezën e Artë', ku shpresojmë për një tjetër paraqitje mbresëlënëse", tha trajneri i kombëtares shqiptare, Zef Gjoni, për ATSH-në.

Në "Gongun e Artë" morën pjesë mbi 70 boksierë nga Shqipëria, Italia, Maqedonia, Serbia, Rusia, Bosnjë-Hercegovina, Mali i Zi, Bullgaria dhe Kuba.

Përveç medaljes së arit, talenti 18-vjeçar Xhuljo Vrenozi është shpërblyer nga organizatorët edhe me 600 euro, prej të cilave 200 për suksesin në gjysmëfinale dhe 400 për suksesin në finale.

Edicioni i 40-të i "Gongut të Artë" u zhvillua në palestrën moderne "Boris Trajkovski" të Shkupit, ndërsa sportisti më i mirë i turneut u shpall boksieri rus, Maksim Gazizov, në peshën 75 kg