Nxënësit shqiptarë të kolegjit privat “Jahja Kemal” në Gostivar, organizuan një manifestim me rastin e festave të Nëntorit. Ata kishin përgatitur një program të pasur kulturor të cilin e prezantuan para shokëve, pedagogëve dhe prindërve të tyre.

Pedagoget e gjuhës shqipe në këtë kolegj, kishin përgatitur referat dhe video prezantim për 22 Nëntorit si një datë me rëndësi të veçantë për historinë e kombit shqiptar, kur para 102 vitesh në Manastir u mbajt Kongresi i alfabetit të gjuhës shqipe.

Nxënësit u paraqitën me recital, këngë dhe valle popullore, ndërsa kishin organizuar edhe një ekspozitë me veshje kombëtare dhe eksponate nga folklori shqiptar. Në fund të manifestimit u shtrua një koktej për të pranishmit.

Në këtë manifestim mori pjesë edhe një delegacion nga Komuna e Gostivarit, i udhëhequr nga sekretari i komunës Naxhi Xhelili.