Opozita me duartrokitje ka mirëpritur mos miratimin e ndryshimeve dhe plotësimeve të Ligjit për organizim dhe punë të organeve të administratës shtetërore, për të cilin nevojiten dy të tretat e votave.

Nuk ndihmoi as prezenca e liderit të BDI-së, Ali Ahmeti, për të miratuar ligjin në fjalë e as periudha e pritjes prej gati një orë për të siguruar pjesëmarrjen e nevojshme të deputetëve. Kësaj radhe munguan deputetët e PLD-së, të cilët në disa raste i kanë mundësuar shumicës parlamentare votat e nevojshme për ligjet e kësaj natyre.

Opozita përshëndeti këtë dështim, ndërsa kryetari i parlamentit reagoi ndaj sjelljes së deputetëve të opozitës.
“Kjo tregon se gjërat kanë filluar të lëvizin në favor të opozitës”, deklaroi Cvetanka Ivanova, LSDM.

“Ju lutem nuk është e diel është e hënë, sot është ditë pune dhe ju lutem të silleni në përputhje me funksionin që e ushtroni, dje ishte e arsyetuar por sot nuk është korrekt kështu të silleni”, deklaroi Trajko Veljanovski kryetar i parlamentit.

Nga ana tjetër sot edhe sektori civil reagoi për ligjet që parashikojnë reformat në administratën publike. Sipas tyre procedura e shkurtër e miratimit të ligjit është jo transparente dhe në kundërshtim me rekomandimet e Komisionit Evropian. Ata vlerësojnë se problematike është edhe përmbajtja e ligjit me të cilët garantohet partizimi i skajshëm i administratës.

“Ne në Maqedoni definitivisht do të kemi një administratë ku hyrjen dhe daljen do ta rregullojë ministri, pra drejtpërdrejt qeveria. Mënyra e avancimit në asnjë mënyrë nuk do të bëhet në baza meritore që është kriter bazë i reformave dhe praktikisht administratën secila qeveri qw vjen do ta mbush me kuadrot e veta partiake”, u shpreh Fani Karanfillova-Panovska, nga Insituti ‘Shoqëria e Hapur-Maqedoni’.

Me ligjin e ri seriozisht shkurtohen ingerencat e Agjencisë për nëpunës shtetëror. Një pjesë e madhe e këtyre ingerencave i kalojnë Ministrisë për Shoqëri Informatike dhe administratë. Projekt-ligji i ri pritet që para deputetëve të del enjten, për votim me procedurë të shkurtër.