- Autoritetet kroate lëshuan fletëarrest ndërkombëtar për ish-kryeministrin e Kroacisë, Ivo Sanader, i cili e braktisi vendin mu para se Kuvendi kroat të votojë për marrjen e imunitetit të tij prej deputeti, transmetuan mediumet.

Zëdhënësi i policisë, Krunosllav Borovec kumtoi se fletëarresti ishte lëshuar gjatë natës ndërmjet të enjtes dhe të premtes dhe i është dërguar Interpolit.

Sanader dje në mëngjes, pa kurfarë probleme u largua nga Kroacia, sepse gjatë asaj kohe ende nuk pati urdhër për arrestimin e tij.

Sipas ligjeve kroate, një deputet mund të mbahet apo dënohet, vetëm nëse i hiqet imuniteti.

Parlamenti ia hoqi Sanaderit imunitetin dje pasdite, por brenda asaj kohe ai tashmë ishte larguar nga vendi.

Sanader akuzohet për keqpërdorim të pozitës zyrtare gjatë kohës kur ishte kryeministër - prej vitit 2004 deri në vitin 2009.

Nuk është bërë e ditur se ku ndodhet Sanaderi për momentin.

Policia kroate për momentin po kryen bastisje në shtëpinë familjare të Sanaderit në Zagreb.