Gjergji Mima

- Kombëtarja shqiptare e futbollit mund të luajë një ndeshje miqësore me Slloveninë, në datën e lirë të 9 shkurtit të vitit të ardhshëm, përpara se ajo të ballafaqohet me Bjellorusinë, në ndeshjen e pestë zyrtare në kualifikueset e Kampionatit Europian.

Pas dështimit të tratativave me Letoninë, Sllovenia mbetet një opsion i hapur për formacionin e kroatit Josip Kuzhe. Federata Shqiptare e Futbollit ka nisur kontaktet me homologët sllovenë.

Trajneri Kuzhe ka kërkuar me insistim gjetjen e një kundërshtari për miqësoren e 9 shkurtit pasi sipas tij ekipi duhet të zhvillojë një tjetër ndeshje testuese përpara sfidës me bjellorusët që na mposhtën 2-0 në Minsk, në muajin tetor dhe Sllovenia duket një kundërshtar në nivelin e Bjellorusisë.

Kundër slovenëve, kuqezinjtë kanë luajtur në eliminatoret e Euro 2008-s, ndaj të cilëve kanë barazuar pa gola në të dyja ndeshjet. Shqipëria, të paktën nën drejtimin e Josip Kuzhesë, nuk ka humbur asnjë nga 7 miqësoret e zhvilluara me kroatin në pankinë. Miqësorja e fundit është ajo me Maqedoninë në Korçë e përfunduar me rezultatin
0-0.