Bashkëpunimi ndërmjet subjekteve kyçe për siguri të qytetarëve, dorëzimi vullnetari armëve pa leje dhe legalizimi i tyre, keqpërdorimi i materialeve piro-teknike dhe të shtënat në festa dhe ahengje familjare, ishin temat kyçe të cilat u trajtuan në takimin e përbashkët të përfaqësuesve të komunës, policisë dhe përfaqësuesve të bashkësive lokale.

Sekretari i komunës së Gostivarit Naxhi Xhelili, në diskutimin e tij potencoi mungesën e bashkëpunimit dhe komunikimit të Stacionit policor të Gostivarit, posaçërisht të komandantit Shuvaip Dalipi, me Komunën, duke nënvizuar se një situatë e këtillë ka refleksion evident në gjendjen e sigurisë në Gostivar e rrethinë.

Përfaqësues të Sektorit për punë të brendshme në Tetovë, i njoftuan të pranishmit me dispozitat ligjore për dorëzim të armëve pa leje si dhe me procedurën për aplikim për legalizim të armëve. Ata bënë apel deri te kryetarët e bashkësive lokale që të ndikojnë në ngritjen e nivelit të bashkëpunimit dhe komunikimit me policinë, në drejtim të rritjes së sigurisë dhe rendit publik.

Kryetarët e bashkësive lokale, deri te përfaqësuesit e policisë drejtuan kritika për prezencën e dobët të patrullave policore nëpër vendbanimet rurale, ku vjedhjet dhe krimet tjera janë në rritje e sipër.

Në fund të këtij takimi, u shpërndanë materiale propaganduese për rritjen e vetëdijes së qytetarëve në lidhje me keqpërdorimin e armëve dhe materialeve piro-teknike.