Ambasadori amerikan në Shkup, në një intervistë për emisionin ‘Me shëndet qethja’, ka deklaruar se nuk e ka ndërmend të takohet me kreun e Partisë Demokratike Shqiptare Menduh Thaçi, përderisa ky i fundit nuk kthehet në Kuvend. Riker ka theksuar se megjithatë me liderët tjerë takohet vazhdimisht.

“Nuk shihemi me z. Thaçi. Takohemi në evenimente të ndryshme, por derisa e bojkoton institucionin e demokracisë të Republikës së Maqedonisë, pra, Kuvendin, për fat të keq, nuk shoh pse do të ishte relevante të takohem me të.

I kam thënë se, nëse kthehen në Kuvend, me kënaqësi do të takohem me të. Por, shihem me liderë tjerë të partive shqiptare, ashtu siç shihem me liderët e partive politike maqedonase, si dhe me liderët e partive politike të bashkësive tjera etnike.

Me të vërtetë mundohem, këtë do t’ua tregojnë edhe njerëzit e personelit tim se, madje punoj intensivisht për t’u takuar me spektër të gjerë të qytetarëve, derisa edhe ata dëshirojnë të takohen me mua”, deklaroi Filip Riker, ambasador i SHBA-së në Shkup. Alsat-M