Studentët e Fakultetit të Arteve të USHT-së, nga Programi studimor i Artit dramatik, vazhdojnë të arrijnë rezultate kulmore në të gjitha aktivitetet dhe festivalet që paraqiten, madje edhe në ato ndërkombëtare.

Filmi i metrazhit të shkurtër “Tri dritare”, i realizuar nga studentët e USHT-së, Faton Bajraktari – regjisor, Latif Husolli – kamera dhe montazhi dhe Fatmire Dardhishta – grimi, të udhëhequr nga profesori Isa Qosja, ka fituar tre çmime ndërkombëtare. “Ishim në Swiss Kos, një festival ndërkombëtar i organizuar në Basel të Zvicrës.

Festivali tjetër është “Hyjnesha në Front”, në qytetin e Gjilanit, dhe çmimi i fundit është “Tirana film fest”, në të cilin kemi marrë çmimin, Filmi më i mirë i shkurtër kombëtar”, deklaroi Faton Bajraktari, regjisor i filmit.

Kamerën dhe montazhin e këtij filmi të metrazhit të shkurtër e ka bërë Latif Husolli, i cili për punën e tij është shpërblyer disa herë me çmime të ndryshme. Asistente e regjisë në këtë film, i cili fitoi çmime në këto festivale ndërkombëtare është Diellza Miftari.

Gjithsesi, më i kënaquri për këtë arritje të studentëve është profesori i tyre, regjisori i mirënjohur Isa Qosja, i cili këtë sukses të studentëve të tij e konsideron edhe sukses personal “parimisht e konsideroj ndoshta ndër sukseset e mia të mira, kisha thënë për faktin që fitojnë studentët, meqë ata janë ardhmëria e kinematografisë.

Unë e konsideroj se kjo ka vlerë dhe ky vërtet është sukses. Dhe e dyta, dëshmohet që në një vend ku punohet edhe pse nuk ka pasur traditë të mëhershme në regjinë e filmit, megjithatë sukseset nuk mungojnë”, thotë Isa Qosja, profesor i studentëve të shpërblyer.

Filmi “Tri dritare” është realizuar me një buxhet tejet të vogël, afër 5000 euro, zgjat tridhjetë minuta, ndërsa është xhiruar në Kosovë. Tematika e filmit flet për dhunimin e grave gjatë luftës në Kosovë dhe përballja e tyre me pasojat pas përfundimit të luftës.