Kryetari i komunës së Gostivarit dhe kryetari i Klubit të emigrantëve “Debreshi“ në Zvicër, nënshkruan sot kontratë për participim financiar në ndërtimin e basenit për ujësjellësin e fshatit Debresh.

Me këtë kontratë, klubi “Debreshi” obligohet që pas përfundimit të procesit të tenderimit dhe përzgjedhjes së realizuesit të punëve, në xhiro-llogarinë e Komunës së Gostivarit të transferojë 50 mijë euro, mjete këto të cilat do të shfrytëzohen për ndërtimin e basenit, si fazë e parë e zgjidhjes së problemit me ujë të pijshëm ne fshatin Debresh.

“Mendoj se në këtë mënyrë ne japim një shembull pozitiv në zbatimin e partneritetit privato-publik, respektivisht partneritetin komunë-qytetarë, në zgjidhjen e problemeve jetike të qytetarëve.

Ky shembull le të jetë një nga motot tona kryesore në absolvimin e projekteve me rëndësi kapitale si për Debreshin ashtu edhe për qytetarët e komunës së Gostivarit në përgjithësi”, deklaroi Osmani me rastin e nënshkrimit të kontratës.

Në emër të Klubit “Debreshi” kontratën e nënshkroi kryetari i këtij klubi Hajredin Osmani. “Me nënshkrimin e kësaj kontrate, bëmë një hap konkret drejt zgjidhjes të një problemi shumë të madh për bashkëfshatarët tonë dhe presim që kjo të realizohet ashtu siç është më mirë”, u shpreh ai.

Faza e parë e projektit për ujësjellësin e Debreshit, pritet të kushtojë rreth 150 mijë euro, prej të cilave 100 mijë do t’i investojë Komuna e Gostivarit, ndërsa 50 mijë vetëfinancim i popullatës lokale.

I gjithë projekti i cili përfshin edhe rikonstruimin e plotë të rrjetit të ujësjellësit, sipas para-llogarive, mund të kushtojë prej 310 deri në 400 mijë euro.

Debreshi është vendbanimi në të cilin problemi rreth furnizimit me ujë të pijshëm, është më i shprehur në komunën e Gostivarit.