Mendja hyjnore qëndron prapa teorive komplekse shkencore si Big Bengu dhe të krishterët duhet të refuzojnë idenë që universi u krijua si pasojë e një aksidenti, deklaroi papa Benedikti XVI gjatë një fjalimi mëngjesin e sotëm.

”Universi nuk është krijuar rastësisht, siç disa shkencëtarë përpiqen të na bëjnë të besojmë”, deklaroi Benedikti. “Në krijimin e universit qëndron zgjuarsia e Krijuesit, kreativiteti i pashtershëm i Zotit. Teoritë si Big Bengu vetëm sa zbulojnë origjinën e aftësive të jashtëzakonshme të të Plotfuqishmit”.

Ndonëse Papa ka folur edhe më parë rreth evolucionit, ai nuk ishte kthyer asnjëherë kaq pas në kohë dhe nuk kishte komentuar më parë konceptet e Big Bengut, shpërthimi kolosal që, sipas shkencëtarëve, krijoi universin 13.7 miliardë vjet më parë.

Kërkuesit e CERN, Institutit Evropian Bërthamor në Gjenevë, testuan me sukses gjatë vitit 2010 teorinë e antimateries, e cila mund të qëndrojë pas formimit të galaktikave të gjithësisë.