“Para vetëm një dekade, kjo enklavë shqiptare ishte një provincë e trazuar e Serbisë; forcat serbe të Slobodan Millosheviqit shkatërruan fshatra dhe qytete dhe vranë mijëra civilë, në kërkim të atyre që luftonin. NATO-ja i dha fund luftimeve, por tensionet vazhduan. Që kur Kosova e shpalli pavarësinë në vitin 2008, provoi të nisë gjithçka nga zeroja. Përkundër problemeve dhe kundërthënieve, ka përparim në aspektin e udhëtimit: po ndërtohet një autostradë 1 miliardë dollarëshe, hotelet që ishin pronë e shtetit janë privatizuar dhe ridizajnuar, disa vende historike kanë marrë mbrojtje nga UNESCO, dhe në Aeroportin ndërkombëtar tashmë operon edhe avio-kompania e njohur evropiane, EasyJet.

Turistët do të mund të gjejnë male të thepisura dhe pyje të bukura. Gjithashtu do të gjejnë popullatën më të re të kontinentit, me gati gjysmën e popullatës nën moshën 25-vjeçare.

Kjo statistikë bëhet realitet në Prishtinë, kryeqytet. Në saje edhe të kthimit të kosovarëve që punojnë jashtë, qyteti është i mbushur me kafe, klube nate dhe restorante.

Por, mbetjet nga e kaluara sllave dhe otomane janë atraksionet kryesore. Dikur qendër e Kishës Ortodoske Serbe, qyteti i Pejës e ka Patrikanën e Pejës, një kompleks i mesjetës pranë një gryke, me një enterier të jashtëzakonshëm. Gjithashtu, është edhe Manastiri i Deçanit, i mbushur me skena të gjalla biblike”, transmeton portali indeksonline shkrimin e gazetës amerikane.

Së fundi, gazeta britanike Guardian ka preferuar Brezovicën për lexuesit e saj, kurse CNN e Newsweek e kanë parë Shqipërinë si mesin e atraksioneve të mëdha botërore për këtë vit.