Qendër për qëndrueshmëri energjetike, që do të vendoset në hapësirat e reja të Universitetit të Evropës Juglindore në Shkup, duhet të jetë rezultati nga Memorandumi për bashkëpunim mes Universitetit të EJL-së dhe Universitetit në Sienë, që u nënshkrua sot në Tetovë.

Në takimin morën pjesë ministri i Ambientit të Jetesës dhe Planifikimit Hapsinor Nexhati Jakupi dhe përfaqësues të Ministrisë së Ambientit të Jetesës së Italisë.

"Me këto projekte do të përmirësohet cilësia e jetës dhe ruajtjes së ambientit të jetesës", deklaroi drejtori i Ministrisë italiane të Ambientit të Jetesës, Territorit dhe Detit, Korado Klini.

Sipas ministrit Jakupi, bëhet fjalë për rreth 200 mijë euro, me të cilat qeveria italiane do t'i përkrah projektet tona në pjesën e ambientit të jetesës, me ç'rast prioritet do të jetë mundësimi i kushteve urbane për shfrytëzimin e biçikletave me ndërtimin e shtigjeve, vendosjen e sinjalizimit, e tjerë.

Maksimiliano Montini nga Universiteti në Sienë tha se me Memorandumin e nënshkruar, theks i posaçëm do të vendoset në qëndrueshmërinë, si dhe në rregullimin dhe afrimin ndaj ligjeve të BE-së në pjesën e ambientit të jetesës.

Në takimin është ripërtëritur edhe marrëveshja për bashkëpunim mes ministrive të të dy shteteve, që filloi nga vitit 2005 dhe u realizua në tre sfera - burime ripërtëritëse energjetike, projekte nga Protokolli i Kjotos, si dhe përtëritja e lokacioneve të ndotura. Marrëveshja e re ka të bëjë me mundësimin e lëvizjes së qëndrueshme në rajone urbane.