Luis Figo ka hedhur pluhur mbi Barcelonën duke iu referuar transferimit kontrovers të tij para shumë vitesh nga Barcelona te rivali i përbetuar Real Madrid duke thënë se ishte shumë e lehtë ta lësh Barçën për Realin.

Deklaratat e Figos kanë çuar shumë pluhur në mediet spanjolle duke i hidhëruar kështu tifozët e Barcelonës.

“Ishte e lehtë ta ndërroj Barcelonën për Real Madridin. Më ishte ofruar kontratë më e mirë. Menaxheri më kishte bërë një kontratë të cilën në fillim nuk kisha mundur ta besoj”, tha Figo duke zbuluar më pas edhe përshtypjet e tij të para kur ishte rikthyer për të luajtur në Nou Camp për herë të parë.

“Presioni ishte shumë i lartë pasi që luaja para 90 mijë shikuesve të cilët më kishin mbështetur më herët ndërsa tani ishin kundër”, tha portugezi.