Dy shtetas kosovarë, studentë në Kajro, janë evakuar me anë të ambasadës së Republikës së Shqipërisë. Mbrëmë vonë dy studentët janë asistuar nga personeli i ambasadës së Republikës së Kosovës në Tiranë dhe kanë mbërritur në Kosovë, njoftoi sot Ministria e Jashtme kosovare, e cila i këshillon qytetarët e Kosovës të mos udhëtojnë për në Egjipt, ndërsa atyre me qëndrim në Egjipt iu sugjeron të kthehen në vend.

Bëhet e ditur se në mungesë të marrëdhënieve diplomatike me Republikën e Egjiptit, MPJ e Kosovës po vepron nëpërmjet kanaleve të saj diplomatike në vendet e afërta që t'i ndjekë nga afër zhvillimet e situatës.

Nga informacioni i pranuar merret vesh se në Egjipt, kryesisht në kryeqytetin Kajro, janë rreth 30 shtetas të Republikës së Kosovës, të cilët në kushtet e krijuara rishtazi janë të paprekur dhe mirë me shëndet.

Shtetasit e Kosovës janë rigrupuar dhe kanë lëvizje shumë të kufizuar. Duke qenë kryesisht studentë, disa janë tubuar me studentë të shteteve të tjera dhe të tjerë janë rigrupuar në lagjet e kryeqytetit Kajro