Në dy komuna të Tetovës, Zhelinë dhe Tearce, sot u bë pranim-dorëzimi i funksioneve për kryetarë komunash.

Fatmir Izairi, kandidat i BDI-së, është kryetari i ri i komunës së Zhelinës, i cili theksoi se do të punojë në përmirësimin e infrastrukturës, furnizimit me ujë dhe përmirësimin e standardit për jetesë. Kryetari i sapozgjedhur i komunës së Zhelinës pret bashkëpunim të mirë me këshillin 19 anëtarësh, në të cilin nëntë persona janë nga BDI-ja dhe nga pesë nga PDSH-ja dhe Demokraci e Re. Ai në funksion vjen nga pozita e drejtorit të një institucioni shëndetësor privat në Zhelinë.

Edhe në Tearcë kryetari i deritanishëm i komunës Rami Qerimi e priti kryetarin e ri të komunës Isen Asani. Që të dy vijnë nga BDI-ja. Kryetari i sapozgjedhur i komunës, Isen Asani, potencoi se së bashku me ekipin e tij gjatë katër viteve të ardhshme do të punojë që t'i realizojë të gjitha projektet e parapara të programit zgjedhor.