Bashkësia Fetare Islame në Maqedoni sot reagoi ndaj kumtesës së djeshme të Kongresit Maqedonas Botëror në të cilën thuhet se xhamitë dhe pronat vakëfe nga koha e Perandorisë osmane nuk janë pronë e BFIM-së, e as që ka të drejtë për trashëgimi ndaj tyre.

"BFI-ja është institucion fetar afatgjatë nga paraqitja e islamit në këto hapësira. Edhe atëherë kur ka qenë pjesë e asociacioneve ose lidhjeve të bashkësive islame nga këto hapësira, çdo herë e ka mbajtur autonominë e saj dhe për këtë arsye ka të drejtë personale të patjetërsueshme ndaj gjithë asaj që gjenerata e myslimanëve e kanë ndërtuar si nevojë shpirtërore në këto hapësira dhe e gjithë kjo paraqet pronësi të saj", thuhet në reagimin me shkrim të BFI-së.

Sipas tyre, xhamitë çdo herë i kanë ndërtuar myslimanët vetë dhe me mjetet e tyre për vete dhe asnjëher ato nuk janë ndërtuar nga të tjerë, posaçërisht jo me punë të detyrueshme dhe mjete të detyrueshme.

"BFI-ja asnjëherë nuk ka përjetuar të pezullohet, të jetë pronë e ndonjë bashkësie tjetër fetare ose madje prona e saj të të drejtohet nga bashkësi fetare nga fqinjët siç ka përvojë me disa institucione të tjera fetare në hapësirën tonë", thuhet në reagim.

Nëse e drejta e lashtë për pronësi të kulturës fetare e shpirtërore dikujt i takon në këto hapësira, shtojnë nga BFI-ja, e ajo është pikërisht Bashkësia Fetare Islame dhe atëherë është keqardhje që në vazhdimësi t'i merret e drejta derisa në diskontinuitet t'i njihet e drejta historike e ekzistimit.

"Xhamitë parimisht çdo herë janë ndërtuar në sipërfaqe të pandërtuara dhe kjo paraqet parim të lartë islamikë. Filloi kthimi i pronave të BFI-së e cila padrejtësisht u nacionalizua, edhe pse jo me tempo të dëshiruar, ndërsa dipozitat pozitive ligjore të shtetit e njohin dhe e respektojnë BFI-në si subjekt të pacënueshëm historik dhe fetar dhe juridik", thuhet në reagimin me shkrim të Bashkësisë Fetare Islame.