Lionel Messi foli për mediat në Gjenevë në prag të takimit që Argjentina do të luajë ndaj Portugalisë ditën e nesërme dhe pati fjalë të mira për ish-trajnerin e bardhekaltërve, Diego Armando Maradona.

“Futbollisti më i mirë i të gjitha kohërave është Maradona. E kam thënë më parë dhe vazhdoj ta them. Maradona i ka dhënë shumë Argjentinës”, u shpreh ylli i Barcelonës.

Messi thekson se ende ka të njëjtën ambicie kur luan futboll siç e kishte kur ishte fëmijë: “Unë jam i lumtur kur luaj sepse e dashuroj futbollin dhe gjithmonë do e dua këtë lojë.”

Në lidhje me duelin që nesër do të ketë me Cristiano Ronaldo, Messi uli entuziazmin: “Nuk dua t’i dërgoj asnjë mesazh Cristianos sepse ndeshja e nesërme është thjesht një miqësore. Uroj vetëm që publiku të mbetet i kënaqur.”