Vendosja e bashkëpunimit dhe partneritetit strategjik, ishin fokusi i temave të cilat i trajtuan kryetari i komunës së Gostivarit prof.dr. Rufi Osmani dhe drejtori i Grupacionit ERA nga Sllovenia, z.Gvido Omlladiq.

Në takim u bisedua rreth mundësisë së aplikimit të përbashkët në projekte evropiane që ndërlidhen me efikasitetin energjetik, zhvillimin rural dhe sferën e ekologjisë. Kryetari Osmani shprehu gatishmërinë e vendosjes së bashkëpunimit të mirëfilltë me komuna sllovene të cilat kanë përvoja në projekte evropiane.

“Sllovenia ka ekspertë të shquar në sfera të ndryshme dhe Komuna jonë ka nevojë për asistencë të ekspertëve slloven për ngritjen e kapaciteteve të administratës komunale për aplikim në organizma të ndryshme evropiane dhe botërore, si dhe për implementim e projekteve të ndryshme”, tha mes tjerash kryetari i komunës.

Drejtori i Grupacionit ERA, grupacion ky më i njohur në Maqedoni për nga Panairi i Shkupit, njoftoi kryetarin Osmani se ky grupacion kohëve të fundit, krahas panaireve, ka zgjeruar fushëveprimin e vet në Maqedoni edhe në më shumë sfera tjera ekonomike.

Grupacioni ERA ka formuar organizatën Monopolis - Fondacion për edukim dhe zhvillim, me të cilën organizatë komuna e Gostivarit me projekt për ndriçim publik ka aplikuar te Qendra për bashkëpunim ndërkombëtar,, qendër sllovene përgjegjëse për vendet e Ballkanit Perëndimor.