James Berisha, piloti shqiptar që po lobon për pavarësinë e Kosovës, thotë se ka premtime nga shumë shtete për njohjen e pavarësisë së Kosovës. Në një intervistë për Radio Blue Sky, nga Afrika, Berisha shprehet i kënaqur me premtimet që po merr nga shumë shtete për njohjen e pavarësisë së Kosovës.

Megjithatë, në përvjetorin e tretë të pavarësisë së Kosovës nuk do të jetë në Prishtinë, por do të vazhdojë lobimin në kontinentin afrikan.

Nga kryeqyteti i Kongos veriore, Brandavili, ku ka zbritur me aeroplanin e tij, piloti shqiptaro-amerikan, James Berisha, shprehet i kënaqur me premtimet që po merr për njohjen e Kosovës. Misioni i tij i lobimit që nga 31 tetori është në kontinentin afrikan dhe ai thotë se gjithçka po shkon mirë.

James Berisha tha se ditëve të fundit është takuar me Ministrin e Jashtëm të shtetit afrikan Sotome Principe, nga i cili ka marrë premtime për njohjen e Kosovës. Por, Berisha thekson se premtimet për njohjen Kosovës ka marrë edhe nga shumë shtete tjera ku ai ka lobuar deri tani.

“Gjendem në Brandavil, kryeqytet i Kongos. Lobimi po shkon mirë, ka premtime reale deri tani. 90 shtete ku kam qenë në këto dy vite, janë në pajtim me pavarësinë e Kosovës, por për arsye të caktuara edne nuk e kanë bërë atë. Por, në përgjithësi, kam premtime në shumë shtete. Jam takuar para disa ditëve me Minsitrin e Jashtëm të Sotome principe”, ka thënë Berisha.

James Berisha thotë se nuk e ka pasur sa duhet ndihmën e institucioneve të Kosovës për misionin e tij, i cili është shumë i shtrenjtë. Përkundër kësaj, Berisha shprehet i vendosur që të vazhdojë me misionin e tij, duke theksuar se do ta mbaj premtimin e tij deri në fund. Berisha thotë se misionin e tij e ndihmojnë disa studentë të Univeristetit të Prishtinës.

Piloti shqiptar thotë se nuk do të jetë me 17 shkurt të festojë trevjetorin e Pavarësisë në Prishtinë, por uron një ditë të mirë dhe të mbarë të Pavarësisë dhe shpreson që vitin tjetër të jetë në Kosovë.